Həbsdə olan Bəxtiyar Hacıyevə qarşı kibercinayətkarlığın qarşısı niyə alınmır? – Rüfət Səfərov Çətin sualda

Bakı/27.02.23/Turan: Bir neçə gündür sosial şəbəkələrdə həbsdə 50 gündür aclıq edən Bəxtiyar Hacıyevin şəxsi yazışmaları və özəl görüntüləri yayılır.

Bəxtiyar Hacıyev ötən il dekabrın 9-da xuliqanlıq və məhkəməyə qarşı hörmətsizlik ittihamı ilə həbs edilib.

Dekabrın 15-də Hacıyev azad edilməsi tələbi ilə aclıq elan edib. İctimaiyyət nümayəndələrinin və ailə üzvlərinin israrlı çağırışlarından sonra o, dekabrın 28-də aclığı dayandırıb. Amma yanvarın 9-da Apellyasiya Məhkəməsi onu həbsdən azad etməkdən imtina etdikdən sonra aclığı bərpa edib və bu günə qədər davam etdirir.

Vəkillərin Hacıyevin ev dustaqlığına və ya girov müqabilində məhkəmə istintaqının başlanmasınadək azadlığa buraxılması ilə bağlı çoxsaylı vəsatətlərini məhkəmələr təmin etməyib.

Hazırda isə həbsdə olan fəala qarşı kibercinayətkarlıq baş verir və bunun qarşısı 2 gündən artıq vaxt keçməsinə baxmayaraq hələ də alınmayıb.

Hüquq müdafiəçisi, Müdafiə Xətti hüquq müdafiə təşkilatının həmtəsisçisi Rüfət Səfərov Kamran Mahmudovun təqdimatında yayımlanan “Çətin sual” verilişində bu barədə danışır.