İlin sonunadək Azərbaycan və Ermənistan arasında sülh imzalana bilərmi? – Elxan Şahinoğlu Çətin sual qarşısında

Bakı/13.10.22/Turan: Azərbaycan və Ermənistan ilin sonunadək sülh sazişi imzalamaq niyyətindədir. Bunu Ermənistan Təhlükəsizlik Şurasının katibi Armen Qriqoryan deyib.

Qriqoryan bildirib ki, Ermənistanın xarici işlər naziri Nyu-Yorkda Antoni Blinkenlə görüşüb. Bunun ardınca ABŞ prezidentinin milli təhlükəsizlik üzrə müşaviri Ceyk Sallivan onun Hikmət Hacıyevlə görüşünü təşkil edib.

“Biz əsasən Ermənistanla Azərbaycan arasında olan bir sıra məsələlərlə bağlı müzakirələr apardıq” – deyə Qriqoryan bildirib.

Diplomat sülh sazişinin vaxtı ilə də bağlı söhbət aparıldığını vurğulayıb: “Həmçinin sərhədlərin delimitasiyası və ilin sonunadək sülh sazişi imzalamaqla bağlı danışdıq” – Qriqoryan əlavə edib.

Qriqoryanın sözlərinə görə, delimitasiyanın ilin sonunadək başa çatdırılması nəzərdə tutulur. Sülh müqaviləsi və delimitasiya bir-biri ilə qarşılıqlı əlaqəlidir.

Bakı "beş təməl nizamlanma prinsipinin geniş versiyasını" Yerevana təqdim edib. Bunu isə Bişkekdə Azərbaycanın XİN başçısı Ceyhun Bayramov jurnalistlərə bildirib.

Onun sözlərinə görə, Ermənistan tərəfi təkliflərin tədqiq edilməsi üçün vaxt istəyib. "Hələlik Ermənistan cavab verməyib, onların reaksiyası hələlik bizə aydın deyil", deyə o qeyd edib.

İlin sonunadək sülh sazişi  imzalana bilərmi?

Siyasi şərhçi Elxan Şahinoğlu Kamran Mahmudovun təqdimatında yayımlanan “Çətin sual” verilişində bu barədə danışır.