“Muğanbank”ın ləğvi siyasi qərardır, yoxsa iqtisadi? – Elçin Rəşidov Çətin sualda

Bakı/19.10.23/Turan: Azərbaycan Mərkəzi Bankının (AMB) İdarə Heyətinin qərarı ilə "Muğanbank"ın lisenziyası ləğv edilib.

Bu barədə tənzimləyici qurum məlumat yayıb.

“Muğanbank”ın idarә olunması üzrә bütün sәlahiyyәtlәr, o cümlәdәn bank sәhmdarlarının ümumi yığıncağının sәlahiyyәtlәri müvәqqәti inzibatçıya keçib.

“Muğabank”ın ölkənin bank sisteminin aktivlərində xüsusi çəkisi 1,4%, kredit portfelində 2%, sektorun öhdəliklərində isə 1,3% təşkil edir. Onun lisenziyasının ləğvi bank sektorunun maliyyə dayanıqlığına və maliyyə sabitliyinə heç bir təhdid yaratmır. Məlumatda belə deyilir.

Yerli mediada bu yaxınlarda Prezident administrasiyasının sabiq rəhbəri Ramiz Mehdiyevə bağlı banklarla bağlı mövzular gündəmə gəlmişdi. İndi isə “Muğanbank” haqda belə bir qərarın verilməsinin məhz bu səbəbdən olduğuna dair yerli mediada yazılar dərc olunur. Yerli medianın yazdığına görə, “Muğanbank” ASC-nin Prezident Administrasiyasının sabiq rəhbəri Ramiz Mehdiyevin ailə üzvlərinə (Elmir Maqbet oğlu Mehdiyev - 67,74%, Vəfa Əhməd qızı Vəliyevaya - 10,65% və Fəridə Cahandar qızı Mehdiyevaya 10,03%) məxsus olduğu deyilirdi. Daha sonra isə bankın payının böyük hissəsi Odlar Yurdu Universitetinin rektoru, sabiq deputat Əhməd Vəliyevin oğulları - Samir və Munir Vəliyevlərə ötürüldü, Vəliyevlərin Bankdakı payı 10,65%-dən 88,33%-ə, Mehdiyevlərin payı isə 89,35%-dən 11,67%-ə dəyişdi.

İqtisadçı Elçin Rəşidov Kamran Mahmudovun təqdimatında yayımlanan “Çətin sual” verilişində bu barədə danışır.