Vətəndaş cəmiyyəti nümayəndələrinin ABŞ dövlət katibinin köməkçisi ilə görüşə dair fikirləri

Bakı/09.06.21/Turan: Vətəndaş cəmiyyəti nümayəndələri Rəsul Cəfərov, Günel Səfərova və Anar Məmmədlinin ABŞ dövlət katibinin Avropa və Avrasiya işləri üzrə köməkçisi Filipp Rikerlə görüşündə nə müzakirə olunub? “Vətəndaş” ictimai birliyinin sədri Günel Səfərova Turan-ın “Çətin Sual” verilişinə müsahibəsində bu barədə danışıb.

Onun sözlərinə görə, 2012-ci ildən başlayaraq, Azərbaycanda hakimiyyət qeyri-hökumət təşkilatlarının fəaliyyətini məhdudlaşdırır. İki il sonra bu məhdudiyyətlər qanunvericilik xarakteri alıb. Bundan sonra hüquq-mühafizə orqanlarının və məhkəmələrin qeyri-hökumət təşkilatlarına və vətəndaş cəmiyyətinin ayrı-ayrı nümayəndələrinə qarşı təqibləri başlayıb. Bu günə qədər müstəqil qeyri-hökumət təşkilatlarının, eləcə də bütünlükdə vətəndaş cəmiyyətinin fəaliyyəti xarici donorlarla işləmək qadağası ilə əlaqədar ciddi şəkildə məhdudlaşdırılıb.

Səfərova qeyd edib ki, qüvvədə olan qanunvericilik sosial layihələrin həyata keçirilməsinə mane olur. O, həmçinin qeyd edib ki, qeyri-hökumət təşkilatlarının fəaliyyətini tənzimləyən qanunları əsaslı şəkildə dəyişdirmək qeyri-realdır, amma ən azından onların fəaliyyətinə mane olan qaydaları dəyişdirməyə çalışmaq lazımdır.

Onun sözlərinə görə, Rikerlə görüş qeyri-hökumət təşkilatlarının və vətəndaş cəmiyyətinin nümayəndələrinin ölkədəki vəziyyət haqqında fikrini öyrənmək məqsədilə təşkil edilmişdi. Müharibədən sonrakı dövrdə ermənilərin və azərbaycanlıların birgə yaşayış perspektivləri məsələsi də qaldırılıb. Bundan başqa, ABŞ dövlət katibinin köməkçisini Azərbaycanda hansı layihələrin həyata keçirilə biləcəyi məsələsi maraqlandırırdı. O, həmçinin ictimai-siyasi vəziyyət və qeyri-hökumət təşkilatlarının imkanları ilə maraqlanıb.

Səfərova ABŞ-ın əvvəlki administrasiyasından fərqli olaraq, Co Bayden komandası üçün təkcə təhlükəsizlik məsələlərinin deyil, insan hüquqları və söz azadlığı kimi fundamental dəyərlərin də prioritet olduğuna ümid etdiyini bildirib.

“Buna görə biz siyasi məhbusların azad edilməsində əməkdaşlıq təklifi irəli sürdük”, deyə o bildirib.

Hərbi qulluqçuların işgəncələrə məruz qaldığı və həlak olduğu “Tərtər işi”nə gəlincə, Səfərova görüş zamanı bu mövzuya toxunulmadığını deyib. ““Tərtər işi” bizim daxili məsələmizdir”, deyə o bildirib. -0-