ABŞ prezidenti və dövlət katibi müsəlmanları Ramazanın başlaması münasibətilə təbrik edib

Bakı/06.05.19/Turan: ABŞ prezidenti Donald Tramp və dövlət katibi Mayk Pompeo bütün müsəlmanları müqəddəs Ramazan ayının başlaması münasibətilə təbrik edib.

"Müqəddəs Ramazan ayını qeyd edən bütün müsəlmanlara ən səmimi təbriklərimi çatdırıram, - deyə prezidentin müraciətində bildirilir. - Ramazan müqəddəs Quranın Məhəmməd peyğəmbərə endirildiyi anın yad edilməsi üçün qeyd edilir. Ay göründükdə müsəlman ailələr və icmalar bu vəhyi yad edib, özünürefleksiya, mənəvi cəhətdən yenilənmə və dua ayına başlayırlar".

"Bu ay ərzində hamımızın bizə göndərilmiş ayələr haqqında düşünmək və bir-birimizlə daha sıx ünsiyyətə can atmaq imkanımız var. Ramazan ab-havasında biz birlikdə daha həmahəng və hörmətcil cəmiyyət yarada bilərik", deyə Trampq eyd edir.

Dövlət katibi Pompeo qeyd edir ki, "bir çox müsəlmanlar üçün bu ay diqqəti mənəvi gəncləşmə, yaxşılıq və möhkəmlik, başqalarına mərhəmət və müxtəlif icmalar arasında ahəng üzərində cəmləşdirmək üçün səbəbdir.

Birləşmiş Ştatlarda bir çox məscidlər və evlər müxtəlif konfessiyalardan olan dostları və qonşuları qarşılayır, onlara bizim ortaq Amerika bərabərlik, mərhəmət və alicənablıq dəyərlərimiz altında birləşməyə imkan verir".

"Ötən ay bütün üç İbrahimi dinlərin ibadət yerlərinə hücumlar edildi və bütün dünyada öz dininə azad etiqad etmək imkanı ilə bağlı ciddi problemlər mövcuddur. Hökumətlər və vətəndaşlar hamı üçün dini etiqad azadlığının təmin edilməsi maraqları naminə birgə hərəkət edərək bu sui-qəsdçilərə motivasiya verən kini ən yaxşı şəkildə aradan qaldıra bilərlər. Ramazan bütün konfessiyalardan və ölkələrdən olan insanlar üçün ortaq mərhəmət, hörmət və bir-birinə dəstəyin əhəmiyyətini xatırladır", deyən Pompeo təbrikini aşağıdakı sözlərlə tamamlayır: "Müqəddəs Ramazan ayının başlanğıcında bütün müsəlmanlara sevinc dolu Ramazan arzulayıram". -0-