Beş yapon işçisi Pakistanda avtomobillərini hədəf alan kamikadzedən çətinliklə xilas olub

AP:  Pakistanın Kəraçi liman şəhərində kamikadze mikroavtobusun yaxınlığında partlayıcı jileti işə salıb. Nəticədə 3 nəfər yaralanıb.

Yerli polis rəisi Ərşad Avanın sözlərinə görə, furqon Pakistanın “Suzuki Motors” şirkətində beş yapon vətəndaşının işlədiyi sənaye zonasına doğru gedirmiş. Onun sözlərinə görə, yaponları müşayiət edən polis hücuma məruz qaldıqdan sonra cavab atəşi açaraq, kamikadzenin şərikini öldürüb.

"Hücumun hədəfi olan bütün yaponlar təhlükəsiz şəraitdədir" deyə o bildirib.

Pakistan prezidenti Asif Əli Zərdari və baş nazir Şehbaz Şərif Yaponiya vətəndaşlarına qarşı hücumu pisləyiblər. Onlar ayrı-ayrı bəyanatlarda polisi tez reaksiya verdiyi və hücumun qarşısını aldığı üçün tərifləyiblər. Onlar həmçinin terrorizmin kökünü kəsəcəklərinə söz veriblər və hücumda yaralananların tezliklə sağalması üçün dua ediblər.

Yerli xəbər kanalları zədələnmiş mikroavtobusu göstərir. Avan hücum zamanı yaralanan üç nəfərin xəstəxanada vəziyyətinin stabil olduğunu bildirib.

Yüksək rütbəli polis zabiti Tariq Mastoi bildirib ki, Pakistanda Çin tərəfindən maliyyələşdirilən müxtəlif layihələrdə çalışan əcnəbilərə qarşı mümkün hücumlar barədə məlumat aldıqdan sonra polis mikroavtobusu müşayiət edib. Onun sözlərinə görə, mühafizəçilər və polisin vaxtında və çevik reaksiyası hücumun qarşısını alıb və hər iki hücumçu öldürülüb.

Heç kim məsuliyyəti üzərinə götürməyib, lakin şübhənin kiçik bir separatçı qrupun və ya son illərdə təhlükəsizlik qüvvələrinə hücumlarını artıran Pakistan Talibanının üzərinə düşəcəyi ehtimal edilir. Üsyançılar həmçinin yol tikintisi, elektrik stansiyaları və kənd təsərrüfatı kimi bir çox meqalayihələri özündə birləşdirən Çin-Pakistan İqtisadi Dəhlizinə aid layihələrdə Pakistanda işləyən çinlilərə də hücum ediblər.

Mart ayında beş çinli kişi və onların pakistanlı sürücüsü Pakistanın şimal-qərbində kamikadzenin işlədikləri Pakistanın ən böyük hidroelektrik layihəsi olan Dasu bəndinə doğru hərəkət edərkən partlayıcı yüklü avtomobili vurması nəticəsində həlak olmuşdu.

Bununla belə, Pakistanda işləyən yaponlar oxşar hücumlara məruz qalmayıblar.

Kəraçi Pakistanın ən böyük şəhəri və cənubundakı Sind əyalətinin paytaxtıdır.