BMT Təhlükəsizlik Şurası husilərdən gəmilərə hücumları dayandırmağı tələb edir

DW:  Birləşmiş Millətlər Təşkilatının Təhlükəsizlik Şurası Yəmən üsyançılarının Qırmızı dənizdə gəmilərə hücumlarını dərhal dayandırmağa çağırıb.

Yaponiya və ABŞ tərəfindən təqdim edilən müvafiq qətnamə çərşənbə günü, yanvarın 10-da Nyu-Yorkda on bir səs lehinə və heç biri əleyhinə olmamaqla qəbul edilib. Dörd dövlət - Rusiya, Çin, Əlcəzair və Mozambik bitərəf qalıb.

Rusiya bir neçə düzəliş təqdim etdiyinə görə səsvermə bir neçə saat ləngiyib, onların hamısı rədd edilib, - dpa agentliyi qeyd edir.

Qətnamə husilərin Qırmızı dənizdə ticarət gəmilərinə hücumlarını ən sərt şəkildə pisləyir.

ABŞ, AB və İsrail tərəfindən terror təşkilatı kimi tanınan radikal islamçı Həmas təşkilatı ilə İsrail arasında müharibə başlayandan bəri kəskin şəkildə artan raket və dron hücumları beynəlxalq ticarəti əngəl yaradır, dəniz qanunlarını pozur və regionda təhlükəsizliyə və sülhə zərbə vurur.

Qətnamədə deyilir ki, hücumlar “dərhal” dayandırılmalıdır.

Eyni zamanda husilərdən noyabr ayında ekipajı ilə birlikdə ələ keçirilən Yaponiyanın “Galaxy Leader” gəmisini azad etməyə çağırılır.

ABŞ administrasiyasının məlumatına görə, 2023-cü ilin oktyabr ayından bəri İranın dəstəklədiyi husilər Yəməndən Qırmızı dənizdə yüzdən çox pilotsuz təyyarə və raket hücumu həyata keçirib.

Üsyançıların nümayəndələri daha əvvəl bildirmişdilər ki, onlar yalnız Qəzza zolağına yardım aparan yük gəmilərini buraxacaq.