General Petr Pavel Çexiyanın prezidenti seçilib

420on.cz: Çexiya televiziyası NATO Hərbi Komitəsinin keçmiş sədri, istefada olan general Petr Pavelin ölkə prezidenti seçildiyini elan edib.

Bu gün o, seçkilərin ikinci turunda keçmiş baş nazir Andrey Babişə qalib gəlib.

Hazırda seçki komissiyası son səsləri hesablayır, lakin Babiş artıq Paveli ötə bilməyəcək. Seçki məntəqələrinin 90 faizi üzrə məlumatların hesablanmasından sonra Pavel 57,1 faiz, onun rəqibi isə 42,9 faiz  səs toplayıb.

Petr Pavel siyasi çəkisini Ukrayna münaqişəsi fonunda qazanıb. O, Çexiya vətəndaşlarında ciddi və hörmətli şəxs təəssüratı yaradıb. Namizədin yığcam danışığı, nitqindəki emosiya və əzəmətli duruşu onların xoşuna gəlib.

O, Çexiyanın Rusiyadan enerji müstəqilliyinə tərəfdardır və Ukraynanı dəstəkləyir.

Çexiyanın baş naziri Petr Fiala Petr Paveli qələbə münasibətilə təbrik edib. Parlamentin spikeri Marketa Pekarova-Adamova isə teleefirdə bildirib ki, inauqurasiya mərasimi martın 9-da Praqa qəsrində olacaq.

İstefada olan ordu generalı və NATO Hərbi Komitəsinin keçmiş sədri Petr Pavel prezident seçkilərində Andrey Babişin əsas rəqibi olub. Paveli Babislə Çexiya Kommunist Partiyasına keçmiş üzvlük birləşdirir ki, eks- hərbçi bunu gizlətmir. Müstəqil namizəd respublikanın Qərbə doğru kursunu və öz  prezidentlik kampaniyasının “Çexiya Respublikasına əmin-amanlıq və sülhü qaytaraq!” şüarı altında Avropa İttifaqı və Şimali Atlantika Alyansı çərçivəsində əməkdaşlığın möhkəmləndirilməsini dəstəkləyir.

General Petr Pavelin hərbi karyerası

1983-cü ildə hərbi məktəbi bitirdikdən sonra Pavel desantçılara qoşulub. İngilis dilində sərbəst danışıb ki, bu da ona təkcə xarici məktəblərdə oxumağa yox, həm də postsovet dövründə mühüm hərbi vəzifələr tutmağa kömək edib.

Digər vəzifələr arasında o, podpolkovnik rütbəsində Xorvatiyada UNPROFOR-un tərkibində Çexiya sülhməramlı missiyasına daxil olub və 1993-cü ilin yanvarında orada əlli fransız hərbçinin  xilas edilməsi əməliyyatında iştirak edib. Daha sonra Pavel bürünc ulduzlu Fransa Hərbi Şücaət Xaçına layiq görülüb. Bundan əlavə, Çexiyanın dövlət mükafatı - “Qəhrəmanlığa görə” medalı ilə təltif edilib.

Ən böyük uğur karyerasının lap sonunda gəlib. 2015-ci ildə Pavel NATO Hərbi Komitəsinin sədri vəzifəsini tutub.  O, Şimali Atlantika Alyansının ali hərbi nümayəndəsi və baş katibin baş məsləhətçisi olub. 2018-ci ilin iyununda Paveli bu postda Böyük Britaniya HHQ marşalı Stüart Piç əvəz edib.