“Hizbullah” ilk dəfə Livanın atəşkəs səylərini açıq şəkildə dəstəkləyir, İsrail isə hücumu gücləndirir

CNN: “Hizbullah” Livanda atəşkəsə nail olmaq səylərini dəstəkləyir, onun yüksək rütbəli rəsmisi çərşənbə axşamı bildirib ki, qrup ilk dəfə Qəzzada müharibənin dayandırılması şərti olmadan atəşkəsi açıq şəkildə təsdiqləyib.

“Biz (Parlament sədri Nəbih) Berrinin atəşkəsə nail olmaq şüarı altında həyata keçirdiyi siyasi səyləri dəstəkləyirik. Atəşkəs əldə edildikdən və diplomatiya buna nail olduqdan sonra bütün digər detallar müzakirə olunacaq və qərarlar birgə qəbul ediləcək”, - deyə baş katibin müavini Naim QasIm bildirib.

Livan “Hizbullah”ı bir gün əvvəl İsraili atəşə tutmağa başlayıb. “Hizbullah” bundan əvvəl yalnız Qəzzada HƏMAS ilə atəşkəs razılaşması əldə edildikdən sonra İsrailə hücumlarını dayandıracağını bildirmişdi. İsrail isə “Hizbullah”ın İsraillə münaqişəsini HƏMAS ilə davam edən müharibədən ayırmaqda israr ediR.

Qasım “Hizbullah”ın müharibədə iştirakının 1-ci ildönümü münasibətilə etdiyi çıxışında Livanda da eyni razılaşmanın əldə edilməsi üçün şərt kimi Qəzzada atəşkəsdən bəhs etməyib. Keçən ayın sonunda İsrail “Hizbullah” lideri Həsən Nəsrullahı öldürdükdən sonra bu, Qasimin ikinci çıxışı idi. O vaxtdan bəri İsrail Livanın cənubunda məhdud quru əməliyyatları həyata keçirərək, İsrailin şimalına raket atmaqda davam edən “Hizbullah”ı hədəfə alıb.

“Hizbullah”a bağlı şiə “Amal” partiyasının lideri Nəbih Berri Qərbin vasitəçiliyi ilə aparılan atəşkəs danışıqlarında əsas fiqur idi.

Livanın xarici işlər naziri Abdallah Bu Həbib keçən həftə CNN-ə bildirib ki, Nəsrullah keçən ay BMT Baş Assambleyası zamanı ABŞ prezidenti Co Bayden, fransalı həmkarı Emmanuel Makron və digər müttəfiqlərinin tələb etdiyi müvəqqəti atəşkəsə razılaşıb. Az sonra Nəsrullah İsrail tərəfindən öldürüldü.

ABŞ rəsmiləri CNN-ə bildiriblər ki, Bayden administrasiyası aktiv şəkildə razılaşmanı canlandırmaq cəhdi göstərmir və hərbi əməliyyatları dayandırmaq əvəzinə İsrailin Livanda və İrana qarşı əməliyyatlarını formalaşdırmaq və məhdudlaşdırmaq cəhdləri ilə barışıb.

İsrailin Böyük Britaniyadakı səfiri Sipi Hotoveli bazar günü “Sky News” telekanalına verdiyi müsahibədə Nəsrullahın atəşkəsə razı olmadığını bildirib və Bu Həbibin bəyanatını "gülünc" adlandırıb.