Husilər Rusiya nefti daşıyan tankerə hücum ediblər

РБК:  Yəmən husiləri səhvən Böyük Britaniya ilə əlaqəli olduğuna inanaraq Rusiya neftini daşıyan Panama bayraqlı tankerə hücum ediblər, - “Reuters” Britaniya təhlükəsizlik şirkəti “Ambrey”in bəyanatına istinadən xəbər verir.

Şirkət ehtimal edib ki, gəminin ictimai məlumat bazasında Britaniya ilə əlaqəli olduğu qey edildiyi üçün hədəf alınıb, halbuki bu, köhnəlmiş məlumatdır.

"Panama bayraqlı tanker beynəlxalq tövsiyə edilən tranzit dəhlizi ilə şərqə gedərkən üç qayığı görüb", - agentlik “Ambrey”in hesabatından sitat gətirib və əlavə edib ki, gəmi raketin suya düşdüyünü bildirib.

Şirkət qeyd edir ki, husilər ikinci dəfədir ki, Rusiya nefti daşıyan gəmiyə hücum edirlər.

Yanvarın 12-nə keçən gecə ABŞ və Böyük Britaniya beynəlxalq koalisiyanın dəstəyi ilə Yəməndəki husi hədəflərinə zərbələr endirib. Hücum üçün “Tomahawk” qanadlı raketlərinin buraxıldığı təyyarə və nüvə sualtı qayığından istifadə edilib, - “Reuters” yazıb.

60-dan çox obyekt: hava hücumundan müdafiə sistemləri, radarlar, pilotsuz təyyarələr və raketlər üçün anbarlar və buraxılış yerləri hədəfə alınıb, - deyə ABŞ Mərkəzi Komandanlığı bildirib. “Saab” agentliyi beynəlxalq hava limanlarına da hücum edildiyini yazıb. Husilər 5 üsyançının öldüyünü, daha 6 nəfərin yaralandığını bildiriblər.

Böyük Britaniya və ABŞ Qərb ölkələrinin hərəkətlərini özünümüdafiə və Qırmızı dənizdə husilərin hücumlarına cavab adlandırıb. Hərəkat israr edir ki, o, yalnız “işğal olunmuş ərazilərdəki limanlara” gedən İsrail gəmilərinə hücum edir. Husilər kommersiya daşımalarına heç bir təhlükə olmadığını bildiriblər.

Eyni zamanda, yük gəmilərinə hücumlar həyata keçirilib: məsələn, hərəkat Danimarka Maerskinin konteyner gəmilərinə hücumlar barədə məlumat verib. Nəticədə bir çox gəmiçilik şirkətləri gəmiləri təhlükəli ərazinin ətrafına göndərərək çatdırılma müddətlərini, yanacaq sərfiyyatını və xərcləri artırır.

Rusiya ABŞ və Böyük Britaniyanın hücumlarını pisləyib, Kreml isə onları qeyri-qanuni adlandırıb. Rusiyanın BMT-dəki daimi nümayəndəsi Vasili Nebenzya Vaşinqton və Londonu BMT Təhlükəsizlik Şurasının yanvarın 10-da qəbul etdiyi qətnaməni pozmaqda ittiham edib.