Panama prezidenti kanala nəzarətlə bağlı Trampla danışıqları istisna edir

AFP: Panama prezidenti Xose Raul Mulino cümə axşamı ABŞ-ın yeni seçilmiş prezidenti Donald Trampla Panama kanalına nəzarətlə bağlı danışıqları istisna edib və Çinin kanalın işinə müdaxilə etdiyini inkar edib.

Mulino həmçinin Trampın Atlantik və Sakit okeanları birləşdirən mühüm su yoluna nəzarəti Vaşinqtona qaytarmaq təhdidinə cavab olaraq Amerika gəmiləri üçün ödənişlərin azaldılması ehtimalını rədd edib.

Mulino mətbuat konfransında "Danışılası bir şey yoxdur", - deyib.

"Kanal Panamanındır və panamalılara məxsusdur. Ölkəyə qan, tər və göz yaşı bahasına başa gələn bu reallıq haqqında heç bir söhbətə başlamaq mümkün deyil", - o əlavə edib.

1914-cü ildə açılan kanal ABŞ tərəfindən çəkilib, lakin 31 dekabr 1999-cu ildə ABŞ-ın o zamankı prezidenti Cimmi Karter və Panama millətçi lideri Omar Torrixos tərəfindən imzalanmış müqavilələrə əsasən, Panamaya verilib.

Tramp şənbə günü kanaldan keçən Amerika gəmiləri üçün "gülünc" ödənişləri sərt tənqid etdi və Çinin artan təsirinə işarə edib.

"Bunu Çin və ya başqası deyil, yalnız Panama idarə etlməlidir", -  deyə Tramp özünün "Truth" sosial media platformasında yazıb. "Biz heç vaxt bunun başqa əllərə keçməsinə icazə vermərik!"

Əgər Panama kanalın “təhlükəsiz, səmərəli və etibarlı istismarını” təmin edə bilməsə, “o zaman biz Panama kanalının tam şəkildə və sorğu-sualsız özümüzə qaytarılmasını tələb edəcəyik”, o deyib.

“Çinin heç bir müdaxiləsi yoxdur”

Qlobal yük daşımalarının təxminən beş faizi Panama kanalından keçir, bu da Asiya ilə ABŞ-ın şərq sahilləri arasında üzən gəmilərə Cənubi Amerikanın cənub ucundakı uzun və təhlükəli marşrutdan qaçmağa imkan verir.

Əsas istehlakçı yüklərin 74 faizini təşkil edən ABŞ-dır, Çin 21 faiz ilə onun ardınca gəlir.

Mulino deyib ki, kanaldan istifadə üzrə ödəniş okeanlararası su yolunun "prezidentinin və ya inzibatçısının şıltaqlığına görə" deyil, çoxdan təyin edilmiş "ictimai və açıq proses" əsasında müəyyən edilir.

"Panama kanalı ilə bağlı heç bir şeydə Çinin müdaxiləsi və ya iştirakı qətiyyən yoxdur", - deyə Mulino bildirib.

Çərşənbə günü Tramp heç bir sübut olmadan “Truth” sosial şəbəkəsində yazıb ki, Çin əsgərləri “Panama kanalını məhəbbətlə, lakin qeyri-qanuni istismar edir”.

Mulino bu iddianı da təkzib edib.

“Allah xatirinə, kanalda heç bir Çin əsgəri yoxdur”, deyə o əlavə edib.

Panama 2017-ci ildə Tayvanla əlaqələri kəsdikdən sonra Çinlə diplomatik əlaqələr qurub, bu qərar Trampın birinci administrasiyası tərəfindən tənqid edilib.

Çərşənbə axşamı ABŞ-ın Panama-sitdəki səfirliyi qarşısında toplaşan onlarla nümayişçi “Tramp, ey heyvan, kanalı rahat burax” şüarları səsləndirib və ABŞ-ın yeni prezidentinin şəklini yandırıblar.