Rusiyanın genişmiqyaslı raket zərbəsi Ukraynanın elektrik stansiyalarını sıradan çıxarıb

UPI: Çərşənbə günü Rusiya Ukraynaya genişmiqyaslı raket zərbələri endirib, bunlardan bəziləri enerji obyektlərinə dəyməklə ölkənin bir neçə bölgəsində elektrik enerjisinin kəsilməsinə səbəb olub, - deyə rəsmi şəxslər bildirib.

Ukrayna Hava Qüvvələri bildirib ki, Rusiya bir neçə qanadlı raket buraxıb və bunlar Xarkov və Xmelnitski vilayətlərini,  həmçinin İvano-Frankovsk şəhərini hədəf alıb.

Lvov vilayətinin rəsmi şəxsləri bildirib ki, iki rayonda "kritik infrastruktur obyektləri" zərər görüb.

İvano-Frankovsk hərbi administrasiyasının rəhbəri Svetlana Onişçuk bildirib ki, zərbələr İvano-Frankovskdakı enerji obyektlərinə ziyan vurub, lakin zərərçəkənlər barədə məlumat daxil olmayıb.

"İndi qışın ortasıdır və rusların hədəfi əvvəlki kimi qalır - bizim enerji sektorumuz," - deyə Ukrayna prezidenti Vladimir Zelenski ”Telegram”da yazıb.

"Bu zərbədə 40-dan çox raket, o cümlədən ballistik raketlərdən istifadə edilib. Onların ən azı 30-u məhv edilib.

"Həmçinin gecə 70-dən çox pilotsuz uçuş aparatı müşahidə edilib. Biz Ukrayna hava qalxanını daim gücləndirməliyik”.

Zelenski bildirib ki, NATO və Birləşmiş Ştatlar verdikləri vədləri "hələ tam yerinə yetirməyiblər".

Rəsmi şəxslər bildirib ki, Rusiyanın hücumu səhərə yaxın, yerli vaxtla saat 5:45-də, hava hücumuna qarşı siqnalların işə düşməsi ilə başlayıb.

Bəzi hücumlar Qərbi Ukraynada həyata keçirildiyi üçün Polşa hərbçiləri ehtiyat tədbiri olaraq təyyarələrini havaya qaldırıblar.

Energetika naziri Herman Qaluşçenko hücumlarla bağlı altı bölgədə elektrik təchizatının məhdudlaşdırıldığını elan edib.