Rusiyanın neft tankerləri Krım sahillərində batıb

The Telegraph: Bazar günü Moskvanın ilhaq etdiyi Krım sahillərində iki neft tankerinin batması və onlardan birindən neftin Kerç boğazına tökülməsindən sonra Rusiya xilasetmə işlərini davam etdirib.

Göyərtəsində 15 sərnişinin olduğu 136 metrlik "Volqoneft-212" tankerinin ikiyə bölünməsi, burun hissəsinin batması və göyərtəsinin dalğaların altında qalması nəticəsində ən azı bir nəfər həlak olub.

Rəsmilər bildirib ki, 1969-cu ildə inşa edilmiş Rusiya bayrağı altında üzən gəmi zədələnib və saya oturub.

“Neft sızması baş verib”, - deyə Rusiyanın su nəqliyyatı agentliyi “Rosmorreçflot” məlumat yayıb.

Fövqəladə Hallar Nazirliyinin məlumatına görə, Rusiya bayrağı altında üzən ikinci gəmi, 132 metrlik “Volqoneft-239” zədələndikdən sonra dreyf edib. Gəminin 14 nəfərlik heyəti var və 1973-cü ildə inşa edilib.

Kerç boğazı Rusiya tərəfindən işğal edilmiş Krım yarımadasını materikdən ayıran qlobal dəniz yoludur.

Hər iki tanker təxminən 4200 ton neft məhsulu daşıma qabiliyyətinə malikdir.

Rəsmi açıqlamalarda dağılmanın miqyası və ya tankerlərdən birinin niyə bu qədər ciddi zədələndiyi barədə ətraflı məlumat verilmir.

Putinin fövqəladə hallar və ətraf mühitin mühafizəsi nazirləri ilə görüşündən sonra Kremlin mətbuat katibi Dmitri Peskova istinadən xəbər agentliklərinin verdiyi məlumata görə, prezident Vladimir Putin hökumətə xilasetmə əməliyyatı aparmaq və yanacağın sızmasının nəticələrini yumşaltmaq üçün işçi qrup yaratmağı tapşırıb.

Gəmilər qəza siqnalları verərkən Kerç boğazında olub.

Rusiya əraziyə Mi-8 helikopterləri və xilasedici yedəklər də daxil olmaqla 50-dən çox canlı qüvvə və texnika göndərdiyini bildirib.

“Rosprirodnadzor”un rəhbəri Svetlana Radionova bildirib ki, ekspertlər hadisə yerində dəymiş ziyanı qiymətləndirirlər.

Rusiyanın “Kommersant” qəzeti “Volqoneft-212” tankerinin təxminən 4300 ton mazut daşıdığını yazıb.

“Telegram”da yayımlanan təsdiqlənməmiş videoda fırtınalı dənizdə qaralmış su və yarı batmış tanker əks olunub.

Məlumdur ki, Ukrayna müasir əldəqayırma pilotsuz uçuş aparatlarından istifadə edərək ərazidəki Rusiya hərbi obyektlərinə hücum edir. Kiyev bununla bağlı heç bir şərh verməyib.

Video Telegram / allkrim