Tayvan Fəxri qarovul dəstəsini Çan Kayşi abidəsindən geri çəkəcək

Reuters: Tayvan "avtoritarizmə pərəstiş"ə son qoymaq üçün davam edən səylərin bir hissəsi olaraq keçmiş lider Çan Kayşinin xatirə zalından hərbi fəxri qarovul dəstəsini geri çəkəcək, deyə Mədəniyyət Nazirliyi cümə günü bildirib.

O, sağlığında antikommunist qəhrəman kimi təriflənirdi, lakin bu gün Tayvanda çoxları Çan Kayşini hakimiyyəti dövründə müxaliflərini həbs edən və öldürən bir despot kimi göstərir. Çan Kayşi 1949-cu ildə vətəndaş müharibəsini Mao Tse dun kommunistlərinə uduzduqdan sonra Çin Respublikası hökuməti ilə birlikdə adaya çəkilib.

1975-ci ildə vəfat edəndə onun yerinə oğlu Çan Tszin-kuo gəlib və o, daha böyük siyasi açıqlığa doğru ilkin addımlar atmağa başlayıb.

Böyük Çanın Memorialı nəhəng tunc heykəli ilə Taypeyin mərkəzində ucalır. Mədəniyyət Nazirliyindən bildirilib ki, bazar ertəsindən etibarən fəxri qarovul dəstəsinin üzvləri zalın daxilindəki mərasim postlarından zalın qarşısındakı meydana köçürüləcək.

“Mədəniyyət Nazirliyi həmçinin bu mərhələdə “şəxsiyyətə pərəstişin kökünün kəsilməsini” və “avtoritarizmə pərəstişin dayandırılmasını” Çan Kayşi Memorial Salonunda keçid ədalətinin məqsədləri hesab edir”, - deyə məlumatda bildirilir.

İndi bir demokratik Tayvanda Keçid Ədalət Komissiyası var. O, Çan Kayşi hakimiyyətinə qarşı çıxanların “Ağ terror” kampaniyası zamanı baş vermiş siyasi təqiblərini araşdırır. Tayvanda hərbi vəziyyət yalnız 1987-ci ildə ləğv edildi.

Tayvan son illərdə, o cümlədən 2006-cı ildə adanın əsas beynəlxalq hava limanının Çan Kayşi Beynəlxalq Hava Limanından Taoyuan Beynəlxalq Hava Limanına dəyişdirildiyi zamandan etibarən Çan Kayşinin ictimai məkanda mövcudluğunu tədricən azaldıb.