Trampa sui-qəsd oldu [Video-3]

ABŞ-da prezidentliyə namizəd Donald Trampın Pensilvaniyadakı seçki mitinqində atəş açılıb. Ölkənin 45-ci prezidenti mümkün sui-qəsd cəhdindən sağ çıxıb, iki nəfər öldürülüb, biri şübhəli atəş açan şəxsdir. Bir neçə nəfər yaralanıb.

Respublikaçı partiyasının 2024-cü il noyabr seçkisində namizədi olacağı gözlənən 78 yaşlı Tramp Batlerdə çıxış edən vaxt bir neçə atəş səsi eşidilib.

İnsidentin videolarından Trampın sağa döndüyü, əlini sağ qulağına apardığı, əyilməyə başladığı, Gizli Xidmətin onu qorumağa atıldığı görünür.

Tramp ərazidən çıxarılarkən sağ qulağında və yanağında qan izləri görünüb.

Keçmiş prezident izdihama doğru baxaraq yumruğunu əzmlə qaldırıb.

İnsidentdən az sonra Gizli Xidmətin kommunikasiya rəhbəri Antoni Quqielmi X platformasında yazıb ki, Tramp “salamatdır”. O, əlavə informasiya veriləcəyini deyib.

Trampın sözçüsü CNN-ə prezidentliyə namizədin özünü yaxşı hiss etdiyini, yaxınlıqdakı mərkəzdə tibbi müayinə aldığını bildirib.

Bir neçə günə Respublikaçıların qurultayında Trampın namizədliyinin təsdiqlənməsi gözlənir. Seçkiyə dörd ay qalır.

Trampın rəqibi, ABŞ prezidenti Co Bayden (Joe Biden) deyib ki, Trampın salamat olması, özünü yaxşı hiss etməsini eşitməkdən məmnundur.

Polis atəş açanın adını, motivinin nə olduğunu açıqlamayıb.

ABŞ-ın aparıcı siyasətçiləri atışmanı pisləyiblər.

Senatda çoxluğun lideri Çak Şumer (Chuck Schumer) deyib ki, “ölkəmizdə siyasi zorakılığa yer yoxdur”.

Spiker Mayk Conson (Mike Johnson) da insidenti pisləyib.