Türkiyədə 42 jurnalistin həbsinə order verilib

Türkiyədə ən azı 42 jurnalistin həbsinə order verilib. Onlar hərbi çevrilişə yardımda və Fətullah Gülənlə əlaqələrdə ittiham olunurlar. İttihamın ağırlığını nəzərə alaraq demək olar ki, KİV əməkdaşlarını uzunmüddətli – on ildən ömürlüyə qədər həbs cəzası gözləyir.

Türkiyə hakimiyyəti ehtimal edir ki, hərbçilər, dövlət qulluqçuları, hakimlər və elmi işçilərlə yanaşı jurnalistlərin də dövlət çevrilişinə cəhddə əli var. İstintaq hesab edir ki, onlar “Paralel dövlət” (PYD) qruplaşmasına daxil olublar. Qrupun məqsədi ölkədəki konstitusiya quruluşunu pozmaq və mövcud hökuməti devirmək olub. Bundan əlavə, jurnalistlər hazırda ABŞ-da yaşayan və Türkiyədə baş tutmayan çevrilişə bağlılığı olan müxalifətçi islamçı din xadimi Fətullah Gülənlə əlaqələrdə şübhəli bilinirlər.

Son məlumatlara görə, İstanbulda polis əməliyyatı zamanı siyahıda olan jurnalistlərdən beşi saxlanılıb: Yaqub Sağlam, İbrahim Balta, Seyid Kılıç, Bayran Kaya və Cihan Acar. Digər şübhəliləri də saxlamaq istəyiblər, lakin evdə tapa bilməyiblər. Əgər ittihamlar təsdiqlənərsə jurnalistləri on ildən ömürlüyə qədər həbs cəzası gözləyir,  Hürriyyət yazır. Lakin Türkiyə KİV-i bildirir ki, siyahıda olan 11 jurnalist artıq ölkədən çıxıb.

Məlumdur ki, ittiham olunan jurnalistlər arasında tanınmış şərhçi və keçmiş deputat Nazlı Ilıcak da var. O 2013-cü ildə korrupsiya qalmaqalı ilə bağlı nazirləri tənqidə görə hökumətyönlü  Daily Sabah qəzetindən çıxarılıb.

Türkiyə hakimiyyətinin bu hərəkəti Beynəlxalq Jurnalistlər Federasiyasının narazılığına səbəb olub. Qurum Avropa Şurasına müraciət edib. Bu barədə federasiyanın prezidenti Filip Leru bildirib. “Bu narahatlıq  hər zaman olduğundan daha böyükdur. Biz Türkiyə hakimiyyətini və prezident Rəcəp Tayyip Ərdoğanı mətbuat azadlığına əməl etməyə çağırırıq”, - Leru vurğulayıb. 02D-