Ukrayna Sovet İttifaqının Rusiya ilə dostluq abidəsini sökür

AFP:  Çərşənbə axşamı Kiyev hakimiyyəti Moskvanın on minlərlə insanın həyatına son qoyan işğalından iki ildən çox keçəndən sonra Rusiya ilə dostluğa həsr olunmuş Sovet dövründən qalma abidəni sökməyə başlayıb.

“Şəhərin kommunal xidmətləri abidəni sökməyə başlayıblar”, meriyanın sosial şəbəkələrdə yaydığı məlumatda deyilir.

Abidə 1654-cü ildə Ukraynanı Rusiya ilə birləşdirən müqavilənin imzalanmasının xatirəsinə ucaldılıb.

Abidə - müqaviləni imzalayan ukraynalı və rusiyalıları əks etdirən bir sıra daş heykəllər - ruslar və ukraynalılar arasında "dostluğa" həsr olunmuş memorial kompleksin bir hissəsi kimi Kiyevin mərkəzindəki parkda quraşdırılıb.

2022-ci ildə işğal başlayandan bəri Kiyev hakimiyyəti eyni ərazidə ukraynalı və rus işçilərini əks etdirən iki bürünc heykəli artıq söküb.

"Sökülmə bir neçə gün çəkə bilər,bBuraya hər birinin çəkisi altı-yeddi ton olan 20-yə yaxın eksponat daxildir", - meriyanın məlumatında deyilir.

Abidə Kiyev muzeyinə veriləcək.

Paytaxt sakinlərinin sökülmə ilə bağlı fikirləri bölünür.

"Bunu etmək lazımdır" deyib 32 yaşlı psixoloq Alena Yavorivskaya.

"Mən başa düşmürəm ki, belə bir abidə hələ də burada necə dayana bilər" deyib o.

Lakin 32 yaşlı yanğınsöndürən Aleksandr Severin deyib ki, sökülmə “uyğun deyil” və məmurlar bunun əvəzinə pulu müharibə vaxtı orduya xərcləməlidirlər.

1991-ci ildə Sovet İttifaqından ayrılaraq müstəqillik qazanan Ukrayna illərlə sovet dövründən qalma abidələri sökərək, bir çox yaşayış məntəqələrinin adını dəyişdirərək sovetdən əvvəlki adlarını bərpa edib.

Bu proses Rusiyanın 2014-cü ildə Krımı ilhaq etməsindən və 2022-ci ilin fevralında işğalından sonra sürətləndi.

Keçən il Ukrayna küçə adlarının dəyişdirilməsini və daha çox abidənin sökülməsini tələb edən “dekolonizasiya” qanunu qəbul edib.

Kiyevdə vaxtilə rus yazıçısı Lev Tolstoyun adını daşıyan meydan indi “Ukrayna qəhrəmanları meydanı” adlanır.