Zelenski Ukraynanın 500 mindən çox yeni əsgərə ehtiyacının olmadığını deyir

DPA:  Ukrayna prezidenti Vladimir Zelenski çərşənbə günü daha əvvəl elan etdiyi Rusiyanın işğalı ilə mübarizə üçün lazım olan 500 000 əlavə əsgər hədəfindən imtina edib.

Zelenski Kiyevdə Finlandiya prezidenti Alexander Stubb ilə birgə mətbuat konfransı zamanı deyib: “Bizə yarım milyon lazım deyil”.

Zelenski bildirib ki, cəbhəyə göndərilə biləcək kifayət qədər qoşun var. Ali Baş Komandan Aleksandr Sırski bir qədər əvvəl təxminən eyni şeyi demişdi. Onlardan heç biri tələb olunan kontingent üçün konkret rəqəm açıqlamayıb. Dekabrda Zelenski yarım milyona qədər yeni hərbçinin cəlb edilməsinin vacibliyindən danışırdı. Bu günə qədər yalnız 27 və daha yuxarı yaşda olan kişilər orduya çağırılıb. Zelenski indi bu yaşı 25-ə endirən qanunu imzalayıb, bu da nəzəri olaraq hərbçilərin sayını 400 min nəfər artıracaq. Prezident bildirib ki, Rusiya iyunun 1-də əlavə 300 min hərbçi çağıracaq. Rusiyada təlim keçən çağırışçılar cəbhəyə göndərilməyə bilər.

Moskvanın məlumatına görə, ölkədə hərbi xidmətə hazır olan kifayət qədər könüllü var. İlin əvvəlindən bu rəqəmin 100 min nəfər olduğu bildirilir.

Zelenski və Stubb Ukrayna və Finlandiya arasında 10 illik təhlükəsizlik və dəstək sazişi imzalayıblar, eyni zamanda, Helsinki əlavə maliyyə yardımı göstərməyi, eləcə də qoşunların təlimi, minalardan təmizlənmə və müharibəyə dəymiş zərərin aradan qaldırılması üçün dəstək göstərəcəyini öhdəsinə götürüb.

Ukrayna Böyük Britaniya, Kanada, Danimarka, Fransa, Almaniya, İtaliya və Niderlandla oxşar sazişlər imzalayıb.