"Azərbaycan bərpa olunan enerji ehtiyatlarının payını artırmaq niyyətindədir", nazirin müşaviri

Vyana/06.12.18/Turan: Hazırda Azərbaycanda bərpa olunan enerji mənbələri ilə bağlı qanun layihəsi üzərində iş gedir.

Azərbaycanın energetika nazirinin müşaviri Esmira Cəfərova bunu Vyanada keçirilən Şərq Tərəfdaşlığı Aİ biznes forumunda "Enerji səmərəliliyi və bərpa olunan enerji" mövzusunda paneldə bəyan edib.

O deyib ki, layihə üzrə iş başa çatmaq üzrədir.

"Azərbaycan bu sahədə Avropa Yenidənqurma və İnkişaf Bankı ilə fəal əməkdaşlıq edir və bərpa olunan enerji ehtiyatları şəbəkəsini gücləndirmək üzrə iş gedir.. Azərbaycan bərpa olunan enerji payını ölkənin enerji balansında 20%-ə qədər artırmağı hədəfə alır".

E.Cəfərova "Azərbaycan 2020: Gələcəyə Baxış" dövlət proqramına toxunaraq qeyd edib ki, enerji səmərəliliyi və bərpa olunan enerji mənbələrinin mənbələrinin inkişafı haqda konsepsiya var.

"Yol xəritəsi və digər strateji sənədlər şəklində inkişaf istiqamətləri var, Azərbaycan üçün bərpa olunan enerji resursları mövzusu çox maraqlıdır və bu istiqamətdə böyük planlarımız var".

Belə bir forumun keçirilməsinə toxunan nazirin məsləhətçisi deyib ki, bu cür tədbirlər ölkəmizdə həyata keçirilən işləriin təqdimatı üçün imkan yaradır.

"Azərbaycan təkcə neft və qaz ölkəsi deyil, bərpa olunan enerji sektorunu inkişaf etdirən bir ölkədir. Bu, bizim planlarımızın bir hissəsidir ".

Cümə axşamı Avstriyanın paytaxtı Vyana şəhərində Aİ Şərq Tərəfdaşlığı ölkələrinin (Azərbaycan, Ermənistan, Gürcüstan, Belarus, Ukrayna və Moldova) biznes forumu işə başlayıb.

Tədbirdə Şərq Tərəfdaşlığı ölkələrinin hökumət, biznes dairələri, vətəndaş cəmiyyəti və media nümayəndələri, habelə Aİ üzvləri iştirak edirlər.

İştirakçılar enerji səmərəliliyi, enerji resurslarından səmərəli istifadə və bərpa olunan enerji sahələrində informasiya mübadiləsi ediblər. Bərpa olunan enerji mənbələrinin işlənməsində yeni texnologiyaların tətbiqinə xüsusi diqqət ayrılıb. -71D-