«15 ildə gəlir əldə edən səhmdarlar banklarının kapitallaşmasına vəsait qoymalıdır» - Rüfət Aslanlı

Neftin ucuzlaşması, ölkənin gəlirlərinin azalması, devalvasiya yeni makroiqtisadi vəziyyət yaradıb, deyə bank forumunda Maliyyə Bazarlarına Nəzarət Palatası (MBNP) Direktorlar Şurasının sədri Rüfət Aslanlı bildirib.

Turan-ın məlumatına görə, o deyib ki, devalvasiya yüksək dollarlaşmaya səbəb olub və ilk vaxtlarda dollar depozitləri 83% idi, indi bütün depozitlərin 80%-i qədərdir.  

«Devalvasiya üzündən xarici valyuta ilə kreditlərin ödənilməsi iki dəfə bahalanıb. Nəticədə qeyri-işçi aktivlər artıb. Bankların balansında valyuta qıtlığı yaranıb və bu qıtlıq bankların ziyanına çevrilib», deyə o bildirib.   

R.Aslanlı deyib ki, strateji məqsəd yetərincə kapitalı, likvidliyi olan, risklərə davamlı bank sektoru formalaşdırmaqdır.

Onun sözlərinə görə, bank sektorunun analizi nəticəsində tədbirlər planı hazırlanıb və problemli institutlar sistemdən çıxarılacaq.   

«Buna görə sistemyaradıcı banklara münasibətdə kiçik itki prinsipini tətbiq etdik. Yəni sağlamlaşdırma, yaxud sistemdən çıxarma xərcləri müqayisə edərkən az xərc tələb edən variant tətbiq edilməlidir. Təxminən 10 min fiziki və təxminən o qədər də hüquqi şəxsə xidmət edən “Bank Standart”da belə olub”, - deyə R.Aslanlı bildirib. 

O həmçinin deyib ki, hazırda sistemyaradıcı olmayan, amma kapital problemi olan bankların səhmdarları ilə danışıqlar aaprılır.

«Yeganə şərtimiz bu oldu ki, biznesi olub 10-15 ildə gəlir əldə edən səhmdarlar belə çətin vaxtda əlavə kapital qoysun. Hazırda bir sıra banklarda kapitallaşma başa çatıb. Başqaları bunu ilin sonuna kimi etməlidir», deyə Aslanlı qeyd edib.  71D