2020-ci il üçün Azərbaycan alternativ enerji mənbələrinin payını 20%-ə çatdırmaq istəyir

2020-ci il üçün Azərbaycan alternativ və bərpa olunan enerji mənbələrinin payını 20%-ə çatdırmaq istəyir. Bu barədə Sənaye və Energetika Nazirliyinin aparat rəhbəri Rasim Məmmədov Polşanın Azərbaycandakı səfirliyinin təşkil etdiyi “yaşıl” texnologiyalar üzrə seminarda bəyan edib.

Onun sözlərinə görə, alternativ energetikanın inkişafı çərçivəsində 2020-ci ilə kimi strategiya hazırlanır. 

Azərbaycanda 45 mln ton neft, 27 mlrd m3 qaz hasil edilir və 18 mlrd kilovatt /saat elektrik enerjisi istehsal edilir. Bütün bunlar hasilat zamanı tullantıların azaldılması elektrik enerjisi istehsalı zamanı yanacaq və qaz yandırılmasına qənaət üçün yeni texnologiyaların tətbiqini tələb edir. 

Bu tədbirlərin həyata keçirilməsi üçün ARDNŞ müasir texnologiyaların tətbiqi ilə yeni ekoloji layihələr həyata keçirir. 

Ölkənin neft-qaz maşınqayırmasında da əsaslı müasirləşdirmə lazımdır. Bu müssisəsələr 50 il əvvəl yaradılıb. 

Düzdür, ölkədə müasir texnologiyaların inkişafı üzrə aktiv işlər aparılır. Məsələn, Sumqayıt texnoparkı yaradılıb, Balaxanı sənaye parkı və Yüksək Texnologiyalar Parkı yaradılır. 

Seminarda Polşanın Azərbaycandakı səfiri Mixal Labenda deyib ki, iki ölkə arasında münasibətlər inkişaf edir və daha da dərinləşdirilməlidir. 

Azərbaycan hazırda intensiv inkişaf dövrü yaşayır, bu isə müasir, o cümlədən “yaşıl” texnologiyaların inkişafını tələb edir. --0--