Aİ: ARDNF-dən transfertlər olmadan Azərbaycanın büdcəsi ÜDM-in 19,1%-i qədər kəsirlə icra edilərdi

Davamlı ehtiyatlar və dövlət borclarının aşağı səviyyəsi 2013-cü ildə neftin qiymətinin riskini xeyli yumşaltdı və ölkənin güclü xarici mövqeyini qorudu.

Bu barədə Avropa İttifaqının Avropa Qonşuluq Siyasəti çərçivəsində Azərbaycanın tərəqqisi barədə hesabatında bildirilir.

Amma ölkənin tədiyyə balansında cari əməliyyatların qeyri-neft hesabının kəsiri ÜDM-in 17,4 faizi səviyyəsində qalıb ki, bu da dövlət məqsədilə qeyri-neft məhsullarının idxalı və qaz sektoruna birbaşa xarici investisiyalarla bağlıdır.

 “Azərbaycan dövlət xərclərinin böyük hissəsini karbohidrogenlərin satışı hesabına maliyyələşdirməkdə davam edir: "Belə ki, 2013-cü ildə büdcə gəlirlərinin 58,43 faizi Dövlət Neft Fondundan transfertlər hesabına formalaşdırılıb. Bu büdcəni ÜDM-in 0,47 faizi səviyyəsində profisitlə yerinə yetirməyə yardım edib. ARDNF-dən transfertlər olmadan Azərbaycanın büdcəsi 19,1% kəsirlə icra edilərdi", - deyə hesabatda bildirilir.

Hesabatda deyilir ki, ötən ilin dekabr ayında hökumət yanacaq növlərinin prakəndə qiymətlərini 25-33 faiz artırıb.

* ARDNF-dən 11,35 mlrd manat ($14,5 mlrd) transfertlər olmadan Azərbaycanın dövlət büdcəsi 10,968 mlrd manat və ya 56,3% kəsirlə icra edilərdi. 2013-cü ildə dövlət büdcəsinin gəlirləri (ARDNF-dən transfertlər daxil) 19,494 mlrd manat, xərcləri 19,112 mlrd manat olub. —12D—