AİF-in "Elektron İpoteka Portalı"

Azərbaycan İpoteka Fondu (AİF) 2015-ci il fevral ayının 2-dən "Elektron İpoteka Sistemi"nin (EİS) tətbiqinə başlayır.
Fondun məlumatında deyilir ki, bu tarixindən etibarən EİS sisteminin davamı olan "Elektron İpoteka Portalı" real vaxt rejimində əhalinin tam istifadəsinə veriləcək. Bundan sonra ipoteka kreditindən yararlanmaq istəyən hər bir şəxs birbaşa olaraq internet vasitəsi ilə real vaxt rejimində (onlayn) portalın veb səhifəsinə www.e-ipoteka.az daxil olub müvafiq qaydada ipoteka kreditinin alınması üçün müraciət etməlidir. Yeniliyin tətbiqində məqsəd əhalinin rahatlığının təmin olunması, vaxt itkisinin qarşısının alınması, ipoteka kreditləşməsi sahəsində şəffaflığının daha da artırılması və fondun nəzarət mexanizminin gücləndirilməsidir.

AİF 2005-ci ilin dekabrında yaradılıb və 2006-cı ilin martında ipoteka kreditlərinin verilməsinə başlayıb.

2009-cu il iyunun 1-dən 28 agent bank vasitəsilə kommersiya şərtləri ilə ipoteka kreditlərinin verilməsi prosesi bərpa edilib. Kommersiya şərtləri ilə ipoteka kreditləri dövlət büdcəsi vəsaitlərinin hesabına deyil, fondun öz istiqrazlarını buraxmasından cəlb etdiyi vəsaitlər hesabına verilir.

Kommersiya şərtləri ilə ipoteka kreditləri manatla və yalnız Azərbaycan vətəndaşlarına verilir. Kreditlər 3 ildən 25 ilədək müddətə verilir. Kreditin maksimum həcmi 50 min manatı keçməməlidir. Kredit illik 8%-dən çox olmayan dərəcə ilə verilir.

Dövlət büdcəsindən yalnız sosial ipoteka maliyyələşdirilir. Onun maksimal məbləği 50 min manat təşkil edir, illik faiz dərəcəsi 4%-dən çox deyil.

AİF-in agent-bankları 2006-cı ildən indiyədək 15846 ipoteka krediti verib. Fondun vəsaitləri hesabına ipoteka kreditləşməsinin həcmi 633 mln 280,5 min manat təşkil edib. --17D—