Akkord korporasiyasının rentabelliliyi 12,7%-ə çatıb

“Akkord” korporasiyası iki illik fasilədən sonra 2014-cü ilin maliyyə hesabatını açıqlayıb. Ötən il şirkətin mənfəəti 19,8 mln manat olub. Əvvəlki ildə korporasiya 45 mln 250,4 min manat ziyanla işləmişdi.

2014-cü ildə «Akkord sənaye-tikinti investisiya korporasiyası»nın sənaye və tikinti fəaliyyətindən gəlirləri 155,7 mln manat olub. Bu, 2013-cü ildəkindən 2,2% azdır. Xərclər çıxılandan sonra ümumi mənfəət 53 mln manat təşkil edib. Bu, 2013-cü ildəkindən 20 mln manat çoxdur. İnzibati, maliyyə və başqa xərclər korporasiyasının mənfəətini 19,8 mln manat azaldıb.

Maraqlıdır ki, korporasiya 2014-cü ildə mənfəət vergisi ödəməyib.

“MAK Azerbaijan ltd” şirkətinin auditini keçirdiyi maliyyə hesabatına əsasən, 2014-cü ilin əvvəli üçün korporasiyanın ödənilməmiş ziyanı 106,1 mln manat olub. 2015-ci ilin əvvəli üçün “Akkord”un bölünməmiş mənfəəti 69 mln manatı keçib.

2014-cü ildə “Akkord”un borcları 567,6 mln-dan 531,1 mln manata azalıb. İlin əvvəli üçün korporasiyanın debitor borcları 218,2 mln manatdır.

2014-cü ildə səhmdarların strukturuda dəyişiklik olub: korporasiyanın təsisçisi İlqar Hacıyev payını Darya Vəliyevə satıb. Bundan sonra ikincinin səhm paketi 49%-ə çatıb. «Akkord sənaye-tikinti investisiya korporasiyası»nın səhm nəzarət paketi “VIP Estate” MMC-yə məxsusdur.

İllik hesabata  əsasən, “Akkord”un iki şirkətdə 10%-dən çox iştirak payı var: “Akkord Novanord Construction” MMC (50%) və “Deutsche Fassaden Technologien” MMC (80%).

“Akkord”un hesabatı 14 avqustda səhmdarların ümumi yığıncağında təsdiq edilib. 08D