«Alfa Sığorta»da rəhbərlik yenə dəyişilib

«Alfa Sığorta»da rəhbərlik yenə dəyişilib. Son iki ildə Direktorlar Şurasının üçüncü sədri dəyişir. 

Elşad Əliyevin bu vəzifəyə təyin edilməsi maliyyəçilər üçün gözlənilməz olmayıb. Son vaxtlar «TexnikaBank»ın yenidən strukturlaşdırılması və canlanması üçün onun rəhbərliyinə ABB-nin təmsilçiləri daxil olur. Əliyev son vaxtlara qədər Beynəlxalq Sığorta Şirkətində sədr müavini olub. 

Əliyevdən başqa «Alfa Sığorta»ya BSŞ-dən daha bir neçə nəfər ezam edilib. Fakt təəccüblü olmasa da, proses təəccüblüdür. “Alfa Sığorta” Maliyyə Nazirliyinin kapitallaşma, regionlarda filiallar yaradılması barədə tələblərinə cavab verir və AXA MBASK, AtaSığorta, Atəşgah Sığorta, AzərSığorta, AzSığorta, Xalq Sığorta, Paşa Sığorta, Standard Insurance, Meqa Sığorta, İpək Yolu Sığorta və Azərbaycan Sənaye Sığorta ilə birgə İcbari Sığorta Bürosunun üzvüdür. Amma bu ilin iyulunda «maliyyə intizamını pozduğu üçün» Maliyyə Nazirliyi onun AVSMMİS xidməti hüququnu alıb. 

«Alfa Sığorta» şirkəti 1997-ci ildə təsis edilib. Şirkət 25 sığorta növü üzrə xidmət göstərir. 2008-ci ilin fevralında müddətsiz lisenziya alıb. Yeganə təsisçisi və əsas səhmdarı «Texnikabank»dır. 

Dövlət Sığorta Nəzarəti Xidmətinin məlumatına görə, ötən il şirkətin mükafatları 3 mln 673,95 min manat, ödənişləri 697,12 min manat olub. 

Şirkətin nizamnamə kapitalı 6,75 mln manatdır.   --17D—