Almaniya Azərbaycana 370 mln. avro imtiyazlı kredit ayırır

Almaniya hökuməti 2008-2012-ci illərdə Azərbaycan hökuməti ilə razılaşdırılmış layihələrinin həyata keçirilməsi üçün 370 mln. avro imtiyazlı kredit ayıracaq.

AFR-in Bakıdakı səfirliyinin press-relizində deyilir ki, bu, noyabrın 28-də Azərbaycanın maliyyə naziri Samir Şərifov və Almaniyanın Azərbaycandakı səfiri Haydrun Tempel arasında imzalanmış “2008-2012-ci illərdə razılaşdırılmış layihələr üzrə maliyyə əməkdaşlığı haqqında” hökumətlərarası sazişdə nəzərdə tutulub.

Sənədə əsasən, kredit KfW bankı vasitəsilə verilib. Bu vəsaitin böyük hissəsi – 220 mln. avro Gəncə və Şəki şəhərlərinin “Kommunal infrastruktur proqramları”nın maliyyələşdirilməsinə xərclənəcək.

Bundan başqa, 130 mln. avro “Bərpa edilən enerji və enerji səmərəliliyi üzrə açıq proqram” layihəsinə, 20 milyon avro “Tullantıların ekoloji baxımdan təmiz idarə olunması proqramı” üçün ayrılacaq.

Almaniyanın Federal Hökuməti 2013-cü ilin ortasına qədər KfW bankı vasitəsi ilə büdcə vəsaitlərindən 595 milyon avro həcmində məbləğin verilməsini təsdiq edib. Bu məbləğdən 95 milyon avro artıq tamamlanmış layihələr, 220 miyon avro hazırda icra olunan layihələr və 280 milyon avro gələcək layihələr üçün nəzərdə tutulub.

İki ölkə arasında maliyyə əməkdaşlığı 1993-cü ildən davam edir.

Bundan başqa, Federal Hökumət 1993-cü ildən etibarən Azərbaycan Respublikasına GİZ və digər təşkilatların vasitəsi ilə Texniki Əməkdaşlıq çərçivəsində 75 milyon avro ayırıb. Hazırda hər il bu məqsədlə təxminən 5 mln. avro ayrılır.

Texniki Əməkdaşlığın əsas sahələri qeyri-neft sahədə özəl sektorun dəstəklənməsi, bələdiyyələrin inkişafı, ədliyyə sahəsində islahatlar və biomüxtəlifliyin mühafizəsidir. -06D-