Almaniya ilə dövlət əmlakının idarə edilməsi və özəlləşdirilməsi sahəsində əməkdaşlıq haqqında sənəd imzalanıb

Martın əvvəlində Berlində Azərbaycan Əmlak Məsələləri Dövlət Komitəsi və Almaniya Federativ Respublikasının Federal Maliyyə Nazirliyi arasında dövlət əmlakının idarə edilməsi və özəlləşdirilməsi sahəsində əməkdaşlığa dair anlaşma memorandumu imzalanıb.

Sənədi Əmlak Məsələləri Dövlət Komitəsinin sədri Kərəm Həsənov və  Almaniya Federativ Respublikası adından isə Federal Maliyyə Nazirliyinin Federal Əmlakın İdarə Olunması və Özəlləşdirilməsi Qurumunun baş direktoru Bruno Kahl imzalayıblar. Bu barədə komitənin məlumatında bildirilir.

Memorandumda dövlət əmlakının idarə edilməsi və özəlləşdirilməsi ilə bağlı qanunvericilik sahəsində qarşılıqlı yardım, təcrübə və məlumat mübadiləsi, qarşılıqlı səfərlərin təşkili, məsləhət xidmətlərinin göstərilməsi, investorların özəlləşdirmə prosesinə cəlb edilməsi və s. 

nəzərdə tutulur.

İmzalanma mərasimindən sonra K.Həsənov 1995-ci ildən başlayan və indiyədək davam edən özəlləşdirmə prosesindən danışıb. Onun sözlərinə görə, Azərbaycanda kimya, maşınqayırma, tikinti, nəqliyyat, rabitə, ticarət, xidmət, eləcə də bank sektoruna və bir sıra digər sahələrə aid müəssisələr özəlləşdirilib. Bu illər ərzində 45 mindən çox kiçik müəssisə və obyekt xüsusi mülkiyyətə verilib, 1600-dən artıq orta və iri müəssisə səhmdar cəmiyyətinə çevrilib. Yalnız investisiya müsabiqələri yolu ilə özəlləşdirilmiş müəssisələrə investorlar tərəfindən 982 milyon ABŞ dolları məbləğində investisiya yatırılıb. Dövlət əmlakının özəlləşdirilməsi prosesində 530 min nəfərdən çox adamı əhatə edən mülkiyyətçilər təbəqəsi formalaşıb. Ümumilikdə, 1,5 milyondan artıq vətəndaş özəlləşdirmədən bu və ya digər formada bəhrələnib.08D