AMB manatın üzən məzənnəyə keçdiyini bəyan edib

Dekabrın 21-dən manat dollara və avroya nisbətdə demək olar ki, yarıya qədər ucuzlaşıb.

Bazar ertəsi Amerika dollarının rəsmi məzənnəsi 1,550 manat təşkil edib ki, bu da dekabrın 18-də olduğundan 47,63% çoxdur.

Avronun məzənnəsi manata nisbətdə 47,88% artaraq bazar ertəsi 1,6850 manat təşkil edib.

AMB manatın üzən məzənnəyə keçdiyini bəyan edib. Bu tədbirlər neftin qiymətinin kəskin enməsi və “qlobal iqtisadiyyatda” baş verən proseslərlə, tədiyə balansının tarazlaşdırılması, ölkənin valyuta ehtiyatlarının kritik səviyyədə qorunması, milli iqtisadiyyatın beynəlxalq rəqabət qabiliyyətinin təmin olunmasının vacibliyi ilə  izah edilir.

Bundan sonra manatın məzənnəsi başlıca olaraq  valyuta bazarında tələb və təklifin nisbətini müəyyən edən fundamental amillərin təsirinə uyğun olaraq formalaşacaq. Mərkəzi Bankın valyuta bazarında iştirakı isə bu rejimə uyğun həyata keçiriləcək.

“Eyni zamanda banklarda əhalinin əmanətlərinin və digər depozitlərin təhlükəsizliyinin təmin edilməsi məqsədilə bankların maliyyə dayanıqlığının, kapital və likvidlik mövqeyinin gücləndirilməsi, əmanətlərin sığortalanması sisteminin təkmilləşdirilməsi məqsədilə kompleks tədbirlər görüləcək”, - bankın məlumatında bildirilir.06