AMB və AYİB 2014-2017-ci illər üzrə strategiyanın həyata keçirilməsindən danışıb

Mərkəzi Bankın sədri Elman Rüstəmov Avropa Yenidənqurma və İnkişaf Bankının (AYİB) Maliyyə institutları üzrə icraçı direktoru Nik Tesseymanın rəhbərlik etdiyi nümayəndə heyətini qəbul edib.

Görüşdə Mərkəzi Bank ilə AYİB arasında əməkdaşlıq münasibətlərinin inkişaf perspektvləri və prioritet sahələr üzrə texniki yardım istiqamətləri kimi məsələlər də müzakirə olunub.

  E.Rüstəmov ölkənin maliyyə çıxışlarının genişlənməsi, bank sektorunun qeyri neft sektoruna dəstəyinin gücləndirilməsi və sektorun ümumilikdə daha da inkişaf etdirilməsi istiqamətində AYİB-lə əməkdaşlığın vacibliyindən danışıb. O, qeyd edib ki, AYİB-in Azərbaycan üzrə ölkə strategiyası ölkəmizin inkişaf prioritetlərini dəstəkləyir və birgə fəaliyyət üçün əməkdaşlıq spektrini daha da genişləndirir.

N.Tesseyman öz növbəsində Azərbaycanın regional hadisələr fonunda uğurlu inkişaf dinamikası nümayiş etdirdiyini vurğulayıb. O, AYİB-in ölkənin inkişaf prioritetlərinə uyğun şəkildə Azərbaycanla sıx əməkdaşlığının davam etdirilməsində maraqlı olduğunu bildirib, deyə AYİB-in mətbuat xidməti məlumat verir.

AYİB yanvar hesabatında 2015-ci ildə Azərbaycanda ÜDM artımı proqnozunu pisləşdirib. ÜDM artımı 1,5% proqnozlaşdırılıb. Bu, AYİB-in əvvəlki proqnozundan 2 dəfə azdır. Bank bunu neftin ucuzlaşması ilə əlaqələndirib.

Ötən ilin mayında AYİB 2014-2017-ci illərdə Azərbaycanda fəaliyyət strategiyasında  qeyd edirdi ki, ölkə inkişafın kritik mərhələsinə çatıb və postneft dövrünə inkişaf etmiş özəl sektorla daxil olmalıdır. «İqtisadiyyatın şaxələndirilməsi postneft dövrünə inkişaf etmiş özəl sektorla daxil olmaq üçün həlledici əhəmiyyətə malikdir», deyə strategiyada bildirilir.

Mövcud strategiyaya əsasən, 2014-2017-ci illərdə əsas prioritetlər  iqtisadiyyatın şaxələndirilməsi, özəl sektora dəstək üçün bank sektorunun inkişafıdır. 1991-ci ildən AYİB Azərbaycana 117 layihə üçün 2,1 mlrd dollar ayırıb.—0—