ARDNF: Brexit Fonda ziyan gətirmədi

“Dövlət Neft Fondunun istər maliyyə alətləri, istərsə də valyutalar üzrə yüksək diversifikasiyası onun hazırki investisiya portfelinin qorunmasına şərait yaradır”.

Dövlət Neft Fondunun Böyük Britaniyanın Avropa İttifaqına üzvlüyünün davam etdirilməsi ilə bağlı keçirilən referendumun (Brexit) maliyyə bazarına təsiri ilə bağlı yaydığı açıqlamada belə deyilir.

Fond qeyd edir ki, referendumun nəticələri qeyri-müəyyənlik yaradaraq, dünya maliyyə bazarlarında kəskin dalğalanmalara səbəb olub.

“Bu ilk növbədə özünü qlobal səhm və valyuta bazarlarında göstərib. Bütün əsas səhm indeksləri 5 faizdən artıq düşüb, ingilis funt sterlinqi və avronun məzənnəsi müvafiq olaraq təqribən 10 və 3 faiz enib. Təbii ki, belə kəskin dəyişikliklər bütün investisiya fondlarının və bankların portfellərinə mənfi təsir göstərib”, deyə açıqlamda bildirilir.

Açıqlamaya görə, Fondun səhm yatırımları ümumi vəsaitlərin təxminən 10 faizə qədərini təşkil edir. Digər 90 faiz isə sabit gəlirli qiymətli kağızlarda, daşınmaz əmlakda və qızılda yerləşdirilib. Neft Fondu bu aktivlərin dəyərinin sabit qaldığını, qızılın dəyərində isə kəskin artımın müşahidə olunduğunu bildirir.

ARDNF qeyd edir ki, valyuta məzənnələrindəki qısamüddətli dəyişkənlik fondun valyuta portfelinə nə zərər, nə də mənfəət gətirməyib.

“Fondun investisiya portfelinin vəsaitinin 50 faizi dollar, 35 faizi avro və 5 faizi ingilis funt sterlinqi ilə ifadə olunan aktivlərə, digər 10 faizi isə Böyük Yeddilərə, Avropa Valyuta Birliyinə daxil olan ölkələrin valyutalarında ifadə olunmuş aktivlərə yerləşdirilə bilər”, - deyə fondun açıqlamasında vurğulanır.