ARDNŞ Neft Daşlarında bədbəxt hadisəyə görə sığorta ödənişini kimə edəcək?

Şənbə günü Neft Daşlarında bədbəxt hadisəyə görə ARDNŞ əməkdaşı Musa Hacıyevin ailəsi sığorta ödənişi alacaq. Estakadadan dənizə düşən qalan 3 əməkdaş (Səfədur Zəkərəliyev, Mənsim İmanov və Mais Süleymanov), minimum ödəniş belə almayacaq.

Neftçilərin Hüquqlarını Müdafiə Komitəsinin hüquqşünası Azər Quliyev Turan-a bildirib ki, istehsalatda bədbəxt hadisəyə görə sığorta ödənişi hadisənin ağırlığından, zərər çəkənin maaşından, sahə əmsalından, sığorta polisinin həcmindən asılı olaraq dəyişir.

Onun sözlərinə görə, həlak olan neftçinin ailəsi ödənişi 100% alacq. Qanuna əsasən, aylıq yüz faiz kompensasiya 18 yaşadək uşağa və himayədə olan 23 yaşadək tələbəyə də verilir. Ölüm olmayan qəzalarda müalicə xərcləri ödənilir, həmçinin maaşın 60-80%-i qədər (əlilikdən asılı olaraq) vəsait verilir.

İndiki halda 3 zərərçəkənin “bəxti gətirməyib” – xilasetmə briqadası onları dərhal xilas edib. Sağlamlıqları normaldır.

Neftçilərin Hüquqlarını Müdafiə Komitəsinin sədri Mirvari Qəhrəmanlının sözlərinə görə, bu, cari ildə ölümlə nəticələnən ilk hadisə deyil. 4 fevralda “Nərimanovneft”də Hüseynov həlak olub. Ötən il 6 nəfər həlak olub, 33 neftçi ağır xəsarət alıb. Qaradağ, Nəsimi, Səbail rayon məhkəmələri və Bakı Apellyasiya Məhkəməsi Təşkilatın rəhbərliyə qarşı iddiasına baxır. İddia predmeti bədbəxt hadisələrə görə ödənişin edilməməsi və ya borc, əsassız olaraq işdən çıxarma, ştat ixtisarı, işçilərin hüququnu pozaraq istehsal strukturunun yenidən təşkilatlanmasıdır. İş vaxtından artıq işlətmə, istirahət günlərini istismar, qorxutma halları da olub.

Neftçilərin Hüquqlarını Müdafiə Komitəsinin sədri bildirir ki, ARDNŞ və podratçı təşkilatlar beynəlxalq əmək qanunvericiliyini sistemli şəkildə pozur. Bundan başqa, xarici şirkətlər ingilis dilini bilməyənlərə qarşı diskriminasiya siyasəti yürüdür. --17D—