Avropa Oyunlarının kommunikasiyalarına start verilib

Rabitə və Yüksək Texnologiyalar Nazirliyinin "Bakı Telefon Rabitəsi" istehsalat birliyi Avropa Oyunlarının keçiriləcəyi yerlərdə optik kabel infrastrukturu yaradılmasına başlayıb.

Ümumi uzunluğu 190 kilometr olan optik kabel çəkilməsi planlaşdırılır. Yarışların keçiriləcəyi məkan və digər təşkilati yerlər arasında məlumatın ötürülməsi sürəti 10 giqabit/s təşkil edəcək. Tikinti işlərinin 70 faizi görülüb, işlərin qalan hissəsi isə yaxın vaxtlarda başa çatdırılacaq.

Qarşıdakı işlər çərçivəsində mis telekommunikasiya infrastrukturunun yaradılması da planlaşdırılır. Ümumilikdə optik xətlərin uzunluğu 230 kilometr, mis kabel infrastrukturunun isə təqribən 70 kilometr təşkil edəcək.

İşlər çərçivəsində ISDN xidmətləri tətbiq ediləcək, internetə giriş infrastrukturu genişləndiriləcək, ictimai yerlərdə (park, stadion, ticarət-əyləncə mərkəzləri) ödənişsiz Wi-Fi şəbəkəsi açılacaq. Həmçinin teleradio verilişləri (eləcə də HD formatında yayımın təşkili) üçün keyfiyyətli və davamlı infrastrukturun təşkili üzrə işlərin görülməsi planlaşdırılır. Keyfiyyətli videoaxının təşkili məqsədilə birbaşa beynəlxalq rabitə kanalı və ayrıca optik-lif şəbəkə işə salınacaq. Bundan əlavə, "Azerspace-1" telekommunikasiya peykinin resurslarından da istifadə olunacaq.

I Avropa Oyunları 12-28 iyun 2015-ci ildə Bakıda keçiriləcək. Tədbirdə 6 min idmançı 19 idman növü üzrə yarışacaq. Bunun 16-ı olimpiya idman növləridir. –17D—