AYİB: Yerli biznesə keyfiyyətli konsaltinq lazımdır

Bu gün Abşeron otelində Avropa Yenidənqurma və İnkişaf Bankının 4 günlük seminarı başlayıb.

Cənubi Qafqaz və Türkiyə üzrə proqram rəhbəri Yaap Spreyin sözlərinə görə, kiçik və orta biznesə dəstək maliyyə yardımı yox, daha çox ,məsləhətlərin keyfiyyətindən asılıdır. Amma postsovet məkanında bu seqmentə tələb azdır.

Bir həftədə Azərbaycan mütəxəssisləri marketinq və satış, Azərbaycanda yerli məsləhətçilər üçün bacarıqların yaradılması və onlar tərəfindən yerli müəssisələrə təqdim edilən xidmətlərin keyfiyyətinin yüksəldilməsi kimi məsələlər üzrə təlim alacaqlar.

AYİB Biznes Məsləhət Xidmətləri Proqram Meneceri Lalə Rzayeva bildirib: "Bir çox kiçik və orta müəssisələr indiyə qədər məsləhət xidmətlərindən istifadə etməyiblər. Güclü marketinq texnikasının olması bu kiçik və orta müəssisələrin konsaltinq xidmətlərinin dəyərini daha yaxşı başa düşməsi və məsləhətçinin öz biznesini inkişaf etdirməsi üçün vacibdir".

Avropa İttifaqı və AYİB tərəfindən maliyyələşdirilən seminar Azərbaycanda kiçik və orta müəssisələrə yardım etmək üçün sürətlə inkişaf edən konsaltinq bazarının yaradılması məqsədi daşıyan davamlı səylərin tərkib hissəsidir. 1998-ci ildə Azərbaycanda fəaliyyətə başladıqdan etibarən Kiçik Biznesə Yardım 700-dən çox müəssisənin inkişaf etmək üçün konsaltinq bacarıqlarına yiyələnməsinə yardım edib.

Aprelin 30-da AYİB Bakı ofisi Direktorlar Şurasının iclasında yeni strategiya təsdiq ediləcək. Layihə bankın saytında (http://www.ebrd.com/pages/country/azerbaijan.shtml) verilib.

AYİB Bakı ofisi 1991-ci ildən fəaliyyət göstərir. 2013-cü il noyabrın sonu üçün 6,6 mlrd avroluq 138 layihəyə 1 mlrd 577 mln (23,9%) ayrılıb. Bankın məlumatına görə, investisiyaların 35%-i energetika, 33%-i maliyyə, 21%--i infrastruktur, 11%--i korporativ sektora qoyulub. --17D—