«Azer-Turk Bank» ASC faktiki milliləşib

Türkiyənin «Ziraat Bankası» «Azer-Turk Bank» ASC-dəki aktivləri ilə vidalaşır. Nəticədə «Azer-Turk Bank» 85% yerli kapitallı bank olacaq. 

Əvvəllər agentlik «Ziraat Bankası»nın Bakıda müstəqil biznes açmaq niyyətindən yazmışdı. Bununla bağlı «Azer-Turk Bank»ın tərkibində dəyişiklik olub. Növbədənkənar iclasda yeni tərkib seçilib, həmçinin nizamnamə kapitalının artırılması qərara alınıb.

Belə ki, bankın Müşahidə Şurasının sədri Famil İsmayılov, üzvləri Samir Nəsibov və Müğdət İsmayılov seçiliblər. Həmçinin bankın idarə heyətinin tərkibi 3 nəfərdən ibarət olmaqla yenidən formalaşdırılıb, Elmar Məmmədov idarə heyətinin sədri, Fərhad Adıgözəlov idarə heyətinin üzvü, sədr müavini və Rümiyyə Məmmədova idarə heyətinin üzvü, sədr müavini seçiliblər.

Əvvəllər səhmlərin 50%-i (cəmi 44,2 mln manat) Türkiyə kapitalı idi. İndi bu məbləğin 37,5 mln manatı və ya 85-%-i Azərbaycan dövlətinə, 6,2 milyon manat və ya 14 %-i Türkiyə dövləti Ziraat Bankına, 0,5 milyon manat və ya 1-% isə "Ziraat Bank İnernational AG"-yə (Almaniya) məxsusdur.

Bununla yanaşı, ilin sonuna qədər Bankın nizamnamə kapitalının 50 milyon manata qaldırılması qərara alınıb.

 «Azər-Türk Bank» 1995-ci ildə təsis edilib. Səhm bölgüsü belə idi: Azərbaycan Respublikasının Əmlak Məsələləri Dövlət Komitəsi (50%), Türkiyə Respublikası Ziraat Bankı (46,00 %) və Ziraat Bank Beynəlxalq Almaniya (4.00%).--17D—