Azərbaycan 4 milyard dollar kredit götürmək istəyir

Beynəlxalq Valyuta Fondunun (BVF) nümayəndələri yanvarın 28-dən fevralın 4-dək Bakıda səfərdə olacaq. Eyni zamanda bu günlərdə digər beynəlxalq maliyyə kredit instiutlarının, o cümlədən Asiya İnkişaf Bankı (AİB) və Avropa Yenidənqurma və İnkişaf Bankının nümayəndələri də Bakıya gəlir.  Bu barədə “Financial Times” qəzetinin Azərbaycanla bağlı dərc etdiyi “Beynəlxalq Valyuta Fondu (BVF) və Dünya Bankı neftlə əlaqəli defoltu qabaqlayan hərəkətə keçir" adlı yazıda  deyilir.

Qəzetin yazdığına görə, Azərbaycan höküməti ilə Dünya Bankı arasındakı  danışıqlarda 4 milyard dollarlıq kredit götürmək əsas müzakirə mövzularından biridir.

İqtisadçı ekspert Qubad İbadoğlu yada salır ki, bu günlərdə Azərbaycan höküməti ilə AİB arasında da 1,1 milyard dollarlıq kredit sazişi də imzalanıb.

“Göründüyü kimi, danışıqlar uğurla başa çatarsa bu il ərzində ölkə iqtisadiyyatına son 20 illik borcdan çox kredit cəlb oluna bilər. ÜDM-in dollar ifadəsində getdikcə kiçildiyini də nəzərə alanda bu minvalla xarici borcların yekunda payı 1 il ərzində 2 dəfəyədək arta bilər”, - iqtisadçı qeyd edir.

Xatırladaq ki, neft bumu zamanında BVF ilə Azərbaycan hökuməti  arasında fikir ayrılığı yaranmışdı və qurum 2009-cu ildə Bakıdakı ofisini bağlayıb. 

Azərbaycan BVF-yə 1992-ci ilin sentyabrında daxil olub. 2009-cu ilədək  əməkdaşlıq müddətində fonddan 363 milyon dollar vəsait, o cümlədən 248 milyon dollar güzəştli kredit alınıb. Kredit tranş yolu ilə, iqtisadi islahatlar aparılması öhdəliyi ilə müxtəlif proqramlar çərçivəsində verilib. Onlardan sonuncusunun verilməsi 2005-ci ildə yekunlaşıb. Həmin vaxtdan fondun təkidinə baxmayaraq, Azərbaycan maliyyə cəhətdən möhkəmləndiyini vurğulayaraq kreditlərdən imtina edib, yalnız fondun texniki yardımlarını qəbul edib.-03D-