Media-Monitorinq 28.01.16

Bank sektorundakı ləğvedilmələr, insan haqlarının durumu ölkə mediasının apaırıcı mövzusudur.

Rəsmi qəzetlər isə dövlət başçısı İlham Əliyevin görüşləri haqda xəbərləri, imzaladığı sərəncamların mətnlərini ilk səhifələrdə yerləşdiriblər.

“Ölkədə işsiz bankirlər ordusu yaranır”, - “Azadlıq” qəzeti son vaxtlar bankların bağlanması ilə əlaqədar bu sektordakı kütləvi ixtisarları nəzərə çatdırır.

“Hökumət istiqrazlar vasitəsilə əhalidəki dollarları geri yığmaq istəyir, amma istiqraza verilən cüzi faiz cəlbediciliyi aşağı salır”,  -ekspert Samir Əliyev hökumətin bazara istiqraz çıxarmasını şərh edib.

Bankların yüksək faizlə kredit verdiklərini, əhali əmanətlərinə cüzi faiz ödəməsini ekspert Məhəmməd Talıblı “rüsvayçı depozit faizləri” adlandırır.

“Hüquq müdafiəçiləri, siyasi fəallar və jurnalistlər uzun müddətə azadlıqdan məhrum edilir, hədə-qorxularla üzləşir, mühakimə edilir”, - Human Rights Watch təşkilatının  illik hesabatının Azərbaycanla bağlı hissəsində ölkədə insan haqlarının durumu əksini belə tapır.     

“Normal məhkəmə olsa Vergilər Nazirlyinin keçən il sahibkarlardan topladığı 907 milyon manat qanunsuz vergini geri almaq olar”, - hüquqşünas Müzəffər Baxışov da ölkə sahibkarlarının hüquqlarının pozulmasına səbəb kimi müstəqil məhkəmə sisteminin olmamasını göstərir.

“Daha iki bank bağlandı” yazan “Ekspress” bağlanmış 6 bankın əmanətçilərinə 70 milyon manat kompensasiya verməli olduğunu bildirir.

“Dollar kreditləri məsələsi hökumətin, Mərkəzi Bankın, əhali təmsilçilərinin bərabər iştirakı ilə həll edilməlidir”, - “Exo” yazır,  amma hökumət təmsilşilərinin bu fikirdə olmadıqlarını vurğulayır.

“Beynəlxaq qurumlar yenə də Azərbaycanı tənqid edir”, - yazan “Novoe Vremya”  “Freedom House” təşkilatının hesabatını önə çəkir.

Ölkədə korrupsiyanın genişliyi barəsində yazan qəzet onun səviyyəsinin “korrupsiyanın milli təhlükəsizliyi təhdid etməsi” həddinə çatdığını iddia edir.

“Bizim Yol” bankların tez-tələsik bağlanmasını Mərkəzi Bankın yeni qanunun onlara şamil olunmasını istəməməsi ilə əlaqələndirir.

“Hökumət 30 mindən artıq əmanətlərə kompensasiya vermək niyyətində deyil”, - ekspert Samir Əliyev əhalinin bağlanan banklardakı əmanətlərinin taleyinə aydınlıq gətirib.

Ekspertlər ölkədəki böhran fonunda artan intiharları “gələcəyə ümidsizliyin insanları ölümə sürükləməsi” kimi şərh ediblər. 

“Monitor” jurnalının baş redaktoru Elmar Hüseynovun qətlində “MTN dəstəsi”nin Rabitə Nazirliyindəki adamlarından istifadə etdiyi barədə iddiaları olduğunu yazan “Yeni Müsavat” bu iddiaları “Elmar Hüseynova qarşı terror işində şok gəlişmə” kimi dəyərləndirir.

Deputat Əli Məsimliyə görə, böhrandan çıxa bilməyin əsas yolu “neftsiz də pul qazanmağı bacaran çevik hökumət modelinə keçməkdir”. Deputat bunu böhrandan çxa bilməyin əsas yolu adlandırır.