“Azərbaycan Dəmir Yolları” QSC ilk dəfə olaraq Bakı-Ağstafa-Bakı marşrutu üzrə sürətli qatarla sərnişin daşımalarına başlayır

Bakı/10.03.23/Turan: “Azərbaycan Dəmir Yolları” QSC (MR) martın 18-dən Bakı-Gəncə-Bakı istiqamətində hərəkət edən sürətli qatarın marşrutunu Ağstafa stansiyasınadək uzadacaq və ilk dəfə Bakı-Ağstafa-Bakı xəttində sürətli qatarla sərnişin daşıyacaq.

“Əgər COVID-19 koronavirus pandemiyası (2020-ci il mart) başlanana qədər sərnişinlər Bakıdan Ağstafaya 8 saata daşınırdısa, indi bu 459 km-lik məsafə 4 saat 55 dəqiqəyə qət ediləcək”. deyə ADY məlumat verir.

Hərəkət cədvəlinə gəlincə sürətli sərnişin qatarı hər gün saat 08:45-də Bakıdan Ağstafaya yola düşərək saat 13:40-da mənzil başına çatacaq. Ağstafa-Bakı marşrutu üzrə isə qatar hər gün saat 17:10-da yola düşəcək və Bakı Dəmiryol Vağzalına saat 22:05-də çatacaq. Sürətli sərnişin qatarının müvafiq marşrut üzrə orta sürəti 100 km/saat təşkil edəcək.

Marşrut üzrə Bakıdan Ağstafaya kimi bir istiqamətə gediş haqqı standart sinif üçün yerlərdə 17 AZN, Bakı-Tovuz istiqaməti üçün isə 16 AZN təşkil edir.

459 km uzunluğunda olan Bakı-Ağstafa-Bakı marşrutu üzrə İsveçrənin “Stadler Rail Group” şirkətinin istehsalı olan dörd vaqonlu, ikimərtəbəli sürətli sərnişin qatarı hərəkət edəcək. Qatarın ümumi sərnişin tutumu 364 yerdir. 08B