Azərbaycan sobalıq mazut idxalı imkanına baxır

Azərbaycan sobalıq mazut idxalı imkanına baxır. Bu barədə Turan Agentliyi neft bazarındakı mənbələrdən informasiya əldə edib.

Agentliyin müsahibi deyib ki, mazutu regional bazarlardan almaq istəyirlər. “Hazırda dünya bazarında sobalıq mazutun tonu $120,  regional bazarlarda, xüsusən Rusiya və Türkmənistanda bir qədər ucuzdur”, - deyə o bildirib.

Azərbaycan 2015-ci ilin avqustundan istilik elektrik stansiyalarında sobalıq mazutdan istifadə edir. 2001-ci ildən elektrik enerjisi istehsalı üçün qazdan istifadə olunurdu. 2015-ci ilin avqustunda “Şahdəniz” yatağında təmirlə bağlı 1 aylığa hasilat dayandırıldı. Sonra SOCAR qazdan yeraltı anbarları doldurmaq üçün istifadə etdi.

Ötən il energetikanın ehtiyacı üçün 315 min ton sobalıq mazut tədarük edilib.

1 dekabr 2015-ci ildə Tarif Şurası “Azərenerji” üçün sobalıq mazutun satınalma qiymətini 3 dəfə azaldaraq 1 tonunu 100 manata endirib.

Ötən həftə IP Week konfransında SOCAR rəhbəri R.Abdullayev kuluarlarda deyib ki, “Elektrik stansiyalarımızın çoxu qazdan ucuz olan sobalıq mazutla işləyir”. –12B—