Azərbaycanın 35 rayonunda heyvanlar bünyavirus xəstəliyinə tutulub

Avqustun 28-də Kənd Təsərrüfatı Nazirliyində Səhiyyə Nazirliyinin mütəxəssislərinin iştirakı ilə “Heyvandarlıq sahəsində mövcud vəziyyət, bünyavirus ailəsinə məxsus virus xəstəliyinə qarşı aparılan müalicə-mübarizə tədbirləri və qarşıda duran vəzifələrə” həsr olunmuş geniş kollegiya iclası keçirilib. 

Kənd Təsərrüfatı Nazirliyinin mətbuat xidmətinin məlumatına görə, kollegiya iclasında Dövlət Baytarlıq Xidmətinin rəisi Sialə Rüstəmova bu il iyulun sonlarından başlayaraq xüsusən aran rayonlarında xəstəliyin başlandığını deyib.

Onun sözlərinə görə, qan nümunələri götürülərək Respublika Baytarlıq Laboratoriyasında müayinə aparılıb və  35 rayonda heyvanların xəstəliyə yoluxduğu müəyyən edilib. 

Baytarlıq Xidməti xəstəliklə bağlı Beynəlxalq Epizotik Büroya müraciət edib. 

S.Rüstəmova xəstə heyvanların müalicə olunduğunu və eyni zamanda bu xəstəliyin müalicəyə tabe olduğunu diqqətə çatdırıb. 

“Bu virus mənşəli xəstəlik İngiltərə, Belçika, Almaniya, Fransada  və bir çox Avropa ölkələrində yayılıb, insanların qidalanması üçün heç bir təhlükə mənbəyi deyil  və insanların narahatçılığına heç bir əsas yoxdur”, -o bildirib.

Nazir İsmət Abasov xəstəliyin qarşısının alınması məqsədilə təxirəsalınmaz tədbirlərin həyata keçirilməsi üçün tapşırıqlar verib. O həmçinin baytarlıq və heyvandarlıq sahəsində çalışan mütəxəssislərin yerlərə ezam olunması və bu məqsədlə əhalinin maarifləndirilməsi barədə göstəriş verib.

Kollegiyada Kənd Təsərrüfatı Nazirliyi yanında Dövlət Baytarlıq Xidmətinin Dövlət Baytarlıq Təchizatı Birliyinə daxili vəsait hesabına alınmış 15000 kq. dezinfeksiyaedici maddə -kaustik sodanın rayon (şəhər) baytarlıq idarələrinə bölgüsü aparılması və ən qısa zamanda yerlərə çatdırılması barədə tapşırıq verilib. -03D-