Aztəminatlılar üçün evlər

Gec də olsa, «Azərbaycan ailəsinin strategiyası» layihəsi hazırlanır.

Ailə, Qadın və Uşaq Problemləri üzrə Dövlət Komitəsində Turan-a bildiriblər ki, gənc ailələr üçün sosial mənzil tikintisi planlaşdırılır. Azərbaycanda gənc ailələr üçün kooperativ evlər kimi sosial yaşayış binaları tikilə və bu evlər onlara çox ucuz qiymətə kirayə verilə bilər.  Strategiya layihəsində təklif edilir ki, gənc ailələr üçün ipoteka şərtləri yüngülləşdirilsin. Layihəyə gənc ailələrin reproduktiv sağlamlığının qorunması, ailə planlaşdırılması kimi məsələlər də daxil edilib.

Artıq strategiya layihəsinin işçi qrup səviyyəsində ilk müzakirəsi keçirilib. Sənəd daha da təkmilləşdirildikdən sonra rəy alınması üçün digər dövlət qurumlarına göndəriləcək.

Strategiya “Azərbaycan 2020: Gələcəyə baxış” İnkişaf Konsepsiyasına uyğun olaraq hazırlanıb.

Praktikada belə layihələr dövlət strukturlarından dəstək almır. Dövlət üç il sosial ipotekaya 40 mln manat ayırsa da, onu kommersiya bankları yalnız 2007-ci ilin I yarısında verib.

Deputat Əli Məsimliyə görə, Azərbaycanda müharibədən sonrakı Almaniyadakı kimi «xalq evləri» tikmək doğru olardı. «Həmin 40 mln-a evlər tikib ayda 50-100 manata icarəyə vermək daha doğru olar», - deyə o qeyd edib. --17D—