Bakı-Çikaqo birbaşa hava əlaqəsi açılıb

Bakı/23.09.16/Turan: "Silk Way West Airlines" aviaşirkəti Bakı və ABŞ-ın Çikaqo şəhəri (İllinoys ştatı) arasında birbaşa yük hava əlaqəsi açıb.

Sentyabrın 18-də Heydər Əliyev Beynəlxalq Hava Limanından O'Hare Beynəlxalq Hava Limanına ilk reys yerinə yetirilib, deyə aviaşirkətin mətbuat xidməti bildirir.

Oktyabr ayından etibarən "Silk Way West Airlines" şirkətinin bu marşrut üzrə müntəzəm transatlantik uçuşları həftədə iki dəfə olmaqla Boeing 747-8F Freighter təyyarəsi ilə yerinə yetiriləcək.

Beləliklə, aviaşirkət Amerika Birləşmiş Ştatlarının yük daşımaları bazarında iştirakını daha da genişləndirəcək.

Azərbaycan və ABŞ hökumətləri iki ölkə arasında hava daşımaları bazarının liberallaşdırılmasına imkan verən "Open Skies" hava nəqliyyatı haqqında Saziş 2016-cı il aprelin 6-da imzalanıb.

"Silk Way West" MMC (“Silk Way Holding” şirkətlər qrupunun üzvü) Bakıdan tranzit mərkəz kimi istifadə edərək dünyanın müxtəlif regionlarına -  Asiya, Avropa, Yaxın Şərq və Şimali Amerikaya müntəzəm uçuşlar yerinə yetirir.
Dövlətstatkomun məlumatına görə, bu ilin 8 ayında “Silk Way Holding” aviaşirkətləri 98,9 min ton yük daşıyıb. Bu, 2015-ci ilin eyni dövründəkindən 23% çoxdur. 08D