Bakıda «Vergi sistemində inkişaf və əməletmə» mövzusunda konfrans başlayıb.

Azərbaycanda Amerika Ticarət Palatasının (AmCham) Azərbaycan Respublikasının Vergilər Nazirliyi ilə əməkdaşlığı çərçivəsində “Vergi sistemində inkişaf və əməletmə” mövzusuna həsr olunmuş 5-ci illik vergi konfransı işinə başlayıb.

AmCham-ın prezidenti İlqar Vəliyev bildirib ki, gündəlikdəki əsas məsələlər tədbirin məqsədi ölkənin vergi sistemində aparılan islahatlar, Vergi Məcəlləsinə edilmiş dəyişikliklər, vergi ödəyicilərinin vergi öhdəliklərinə əməletməsi səviyyəsinin daha da yüksəldilməsi, vergi orqanı ilə biznes strukturları arasında tərəfdaşlıq münasibətlərinin inkişaf etdirilməsi, yüksək vergi mədəniyyətinin formalaşdırılmasıdır.

Vergilər Nazirliyinin Vergi siyasəti və strateji araşdırmalar Baş İdarəsinin rəisi Natiq Şirinov bildirib ki, Azərbaycanda həyata keçirilən vergi siyasəti ölkədə biznes mühitinin təkmilləşdirilməsinə xidmət edir. İndi vergi ödəyiciləri bir sıra sahələrdə vergi zamanı seçim imkanına malikdir.

"Deliotte"nin Azərbaycandakı tərəfdaşı Nuran Kərimov Azərbaycanda nağdsız hesablaşmalar zamanı vergi güzəştlərinin tətbiqini təklif edib. Onun sözlərinə görə, dünyanın bir çox ölkələrində nağd vəsaitlərlə aparılan əməliyatlarda məhdudiyyətlər mövcuddur: "Biz ödənişin mütləq qaydada yalnız nağdsız formada aparılacağı yerdə konkret tranzaksiyalar müəyyənləşdirməliyik".

Nağdsız hesablaşmalarda banklar qazandığı üçün onlar vəsait çıxaranda komissiyanı azaltmalıdır. «Əhali nağdsız hesablaşmaların təhlükəsizliyinə əmin olmasa, bu növ geniş yayılmayacaq. Çünki kiber təhlükə bütün dünyanın problemidir. O qeyd edib ki, nağdsız hesablaşmalara keçilməsinə əngəllərdən biri də iqtisadiyyatdakı qeyri-şəffaflıqdır.

Konfrans iki paneldən ibarət olacaq. Konfransın proqramına müvafiq olaraq I panel üzrə Azərbaycanda vergi idarəçiliyi və onun təkmilləşdirilməsi istiqamətləri, II panel üzrə isə vergi inzibatçılığı və vergi ödəyicisi ilə vergi orqanları arasındakı kommunikasiyanın təkmilləşdirilməsi mövzuları ətrafında çıxışlar nəzərdə tutulub.--17D—