Bank Standard Monex sisteminə qoşulub

"Bank Standard" QSC fiziki şəxslər üçün sürətli pul köçürmələri sistemi "Monex"ə qoşulub. Bu barədə bankın məlumatında bildirilir.

"Monex" sistemi "MuğanBank" ASC-nin məhsuludur və ötən ilin sonundan fəaliyyətə başlayıb. Sistemlə pul köçürülməsi və qəbulu 10 dəqiqə çəkir və 500 manatadək vəsait üçün minimal komissiya 1 manat, 500 manatdan sonra məbləğin  0.2%-i qədərdir. Sistemə həmçinin Bank Respublika, Rabitəbank, Əmrahbank, Atabank, Atrabank, Qafqaz İnkişaf Bankı, Bank Avrasiya, Express Bank, Parabank və "Azərpoct" qoşulub. 

Bu gün ölkə bankları arasında Dəmirbank-ın "Şimşək", KapitalBank-ın "Хəzri" və Zaminbank-ın "Caspian Money Transfer" sürətli pul köçürmələri sistemi var.

"Şimşək" daxili istifadə üçündür, "Xəzri" vasitəsilə Rusiya və Ukraynaya əməliyyat mümkündür, amma yerli banklardan onun agenti yoxdur. Caspian Money Transfer ölkə daxilində və xaricdə nüfuz qazanıb. Ölkənin 43 bankından 19-u sistemin agentidir. Bu gün xidmət məntəqələrinin sayı 190 ölkə üzrə 130 minə yaxındır. 

Bank Standard həmçinin Western Union, Xpress Money, Private Money, Faster, Быстрая Почта, Contact, Migom, Zolotaya korona, Blizko, “Lider”, Coinstar və Caspian Money Transfer sürətli pul köçürmələri sistemləri çərçivəsində işləyir.--15D--