Bank VTB Bakıda treninq mərkəzi açır

2014-cü ildə Bakı şəhərində Bank VTB (Azərbaycan) ASC-nin treninq mərkəzi fəaliyyətə başlayacaq. Bu barədə Bank VTB (Azərbaycan) ASC-nin insan resursları İdarəsinin rəis müavini Gülşən Həmidova bildirib. Mərkəzin yaradılmasında məqsəd yeni əməkdaşların öyrədilməsi və işçi heyətinin ixtisaslaşması olduğunu qeyd edən Həmidova qeyd edib ki, zərurət yaranarsa, VTB Qrupunun digər törəmə qurumlarından da mütəxəssislər dəvət olunacaq.

“Treninq mərkəzin yaradılması ideyası Bankın sürəkli inkişaf templəri ilə izah olunur. Təlim mərkəzi bizə kömək edəcək ki, Bankın filial şəbəkəsinin sürətlə genişlənməsi və məhsul çeşidinin artması nəticəsində, habelə xidmətin keyfiyyətinin yüksəlməsi istiqamətində yarana biləcək çətinlikləri aradan qaldıraq”, - deyə G.Həmidova əlavə edib. 

İdarənin rəis müavini bildirib ki, bank daxilində kadrların hazırlanması təcrübəsi daha səmərəlidir. Belə ki, ölkənin bank bazarı böyük olmadığından kadr seçimi imkanları da geniş deyildir. Müvafiq problemin həlli istiqamətində əcnəbi bank mütəxəssislərinin dəvət olunması isə bahalı və az səmərəlidir.

Qeyd edək ki, Bank VTB (Azərbaycan) ASC Bank VTB ASC-nin törəmə bankıdır. Bank VTB (Azərbaycan) ASC-nin səhmdarları Bank VTB ASC və “AtaHolding” ASC-dir. Bank VTB (Azərbaycan) ASC korporativ biznes, kiçik biznes və fərdi müştərilərə xidmətlər göstərir. Bu gün Bank 4 filial və Baş ofisdə yerləşən Müştəri xidmətləri idarəsi ilə təmsil olunub. --15D--