«Banklar haqqında» qanuna əhəmiyyətli dəyişikliklər edilib

Cümə günü parlamentin plenar iclasında “Banklar haqqında” qanuna dəyişikliklər qəbul olunub.

Qanun layihəsini parlamentin iqtisadi siyasət komitəsinin sədri Ziyad Səmədzadə təqdim edib.

Dəyişikliklər bankın öhdəliklərinin könüllü restrukturizasiyasını nəzərdə tutur. Belə ki, bank könüllü olaraq öz öhdəliklərinin restrukturizasiyası üçün məhkəməyə müraciət edə bilər və məhkəmə 10 təqvim günü ərzində bu müraciətə baxmalıdır.

Bundan başqa, qanuna “körpü banklar” anlayışı tətbiq edilir. Bankların problemləri olduqda “körpü banklar” yaradıla bilər. Bir müddət keçdikdən sonra satışa çıxarılacaq problemli bankın sağlam aktivləri və öhdəlikləri müvəqqəti olaraq onlara veriləcək.

Qanun layihəsində problemli bankların könüllü restrukturizasiyası mümkün olmadıqda maliyyə bazarlarına nəzarət edən orqanın səhmdarların və qərar qəbul edənlərin depozitlərini məcburi olaraq bankın səhmlərinə keçirmək və bankın öhdəliklərinin ödənməsi üçün vəsait cəlb etmək üçün bankın səhmlərinin bir hissəsini satmaq hüququ əldə etməsi nəzərdə tutulur.

Dəyişikliklərə əsasən, bankların rəhbərləri və onun problemlərinə görə məsuliyyət daşıyan səhmdarları dəyən ziyanı öz əmlakları ilə ödəməlidirlər. Başqa sözlə, belə bankların səhmdarlarının və rəhbərlərinin əmlakı müsadirə ediləcək və satılacaq. -71D-