Beyləqan rayonu inflyasiyanın səviyyəsi üzrə rekord vurub

Dövlət Statistika Komitəsi (DSK) ölkə üzrə inflyasiyanın səviyyəsinə dair məlumatı açıqlayıb. Məlumata görə, yanvar-oktyabr aylarında ölkə üzrə 2,3% inflyasiya şəraitində ən çox Beyləqan rayonunun sakinləri istehlak qiymətlərində artım hiss ediblər - 7.6%. Qeyd edək ki, Bakıda inflyasiya tempi ölkə üzrə olduğundan azdır (1,9%).

Əgər ölkə boyunca ərzaq malları illik hesablamada 2,2%, Bakıda 2,4% bahalaşıbsa, cəbhəyanı və sərhədyanı Beyləqan rayonunda qiymətlər 9,5% təşkil edib. 

Oktyabrda Masallı rayon sakinləri ailə büdcəsində qiymət artımı (5,1%) müşahidə ediblər. Rayonda ərzaq malları ay ərzində 4,3%, xidmətlər 9,7% bahalaşıb.

DSK-nın hesablamalarına görə, oktyabrda ərzaq malları üzrə ən yüksək qiymət artımı (5,3%)  Daşkəsən rayonunda qeydə alınıb. Bu rayonun sakinləri illik hesablamada ərzaq mallarına 8,6% çox xərcləyiblər. Qeyd edək ki, bəzi rayonların sakinləri də öz büdcələrində ərzaq üzrə illik hesablamada ikirəqəmli artım  müşahidə ediblər:  Tovuz -11,2%, Xaçmaz – 10,5%, Bərdə – 11,8%, Sabirabad – 10,1%, Zərdab – 10,4%, Ağsu – 11,4% və Şirvan – 10,3%.

Deflyasiya “yastıq”ı yalnız Hacıqabul (-0,3%) və NMR (-0,1%) sakinlərinə kömək edib. Qeyd edək ki, rəsmən NMR-də istehlak bazarında qiymətlər dəyişməz qalıb və ya enib. Muxtar respublikada illik hesablamada yalnız xidmətlər bahalaşıb (2%).

İstehlak qiymətlərinin indeksi 563 adda mal və xidmət üzrə monitorinqin əsasında müəyyən olunur.  08D