BFB-də MB listinq qaydaları yenilənib

Bakı Fond Birjasında 2009-cu ildən qüvvədə olan “Qiymətli kağızların listinqi, delistinqi və ticarətə buraxılması qaydaları” yenilənib, listinq tarifləri sadələşdirilib.

Listinq tələbləri üzrə təsnif edilmiş bazar seqmentinin üç səviyyəsi müəyyən edilib: əsas, standart və alternativ. Eyni zamanda birja şirkətlərə 6 aylıq şərti listinq verə bilər. Bu müddət ərzində emitentlər onlara verilmiş seqment üzrə listinq tələblərini yerinə yetirməlidirlər. Əks halda onlar delistinqə məruz qalacaqlar. Paralel olaraq birjada qiyməti təyin edilmək üçün buraxılmamış şirkətlərin qiymətli kağızlarının satılacağı kotirovkasız birja siyahısı fəaliyyət göstərəcək.

Birja listinqinin əsas səviyyəsi üçün namizəd olan şirkətlər müəyyən ciddi meyarlara uyğun olmalıdırlar. Bu səviyyəyə yalnız açıq səhmdar cəmiyyəti kimi yaradılmış şirkətlər namizəd ola bilər. Nizamnamə kapitalının səviyyəsindən asılı olaraq (2,5 mln. manatdan başlayaraq, 10 mln. manatdan çoxa qədər) son 1 ildən 3 ilə qədər xalis gəlirlə işləməlidir. Listinqdən sonra bu şirkətlər nizamnamə kapitalının 5%-dən 10%-nə qədər səhmlərin sərbəst dövriyyəsini təmin etməlidirlər. Bu zaman sərbəst dövriyyədə olan səhmlər ən az 50 səhmdar arasında paylanmalıdır. Müşahidə Şurası üzvlərindən biri BFB-nin meyarlarına görə müstəqil olmalıdır.

Standart seqmentdə listinqə buraxılmaq üçün daha yumşaq şərtlər müəyyən edilib. Bu: sabit maliyyə vəziyyəti, o cümlədən son maliyyə ilində xalis gəlir əldə etmə, minimum 0,5 mln. manat nizamnamə kapitalına və 50 səhmdara malik olma, səhmlərin ən az 5%-nin sərbəst dövriyyəsini təmin etməkdir.

Qeyd etmək lazımdır ki, yeni qaydalara əsasən, birja bazarının əsas seqmentinin tələblərinə cavab verən şirkətlər standart seqmentə daxil ola bilməz. Bu emitentlərin ilk iki meyarlara uyğun olmayan qiymətli kağızları alternativ seqmentə daxil edilir. Bu seqment üzrə müəyyən meyar yoxdur.

Birja seqmentləri üzrə istiqrazlar, həmçinin emitentlərin hesabat formaları üzrə listinq tələbləri də müəyyən edilib.

MB-nin listinq üzrə tarifləri xeyli azaldılıb və sadələşdirilib. Əvvəllər listinqə daxiletmə xidmətlərinin dəyəri 3000 manata çatırdısa, fevralın 1-dən etibarən listinqin əsas səviyyəsi üzrə illik xidmət dəyəri 1000 manat, standart səviyyə üzrə 500 manat, alternativ səviyyə üzrə isə 200 manat təşkil edəcək.

Yeni listinq qaydaları “Kapital bazarlarının müasirləşdirilməsi” layihəsi çərçivəsində, beynəlxalq təcrübə, həmçinin yerli fond bazarının xüsusiyyətləri nəzərə alınmaqla ekspertlərin iştirakı ilə işlənib hazırlanıb. BFB-də heasb edirlər ki, bu qaydalar emitentləri qiymətli kağızlarını listinqə çıxarmaq üçün təşviq edəcək.

2009-cu ildə birja listinqinə cəmi iki şirkətin qiymətli kağızları – “Dəmirbank” ASC-nin səhmləri və “EmbaWood” MMC-nin istiqrazları daxil edilib. -08B-