Birbaşa xarici investisiyaların 90%-i Azərbaycanın neft-qaz sektoruna cəlb edilib

Mərkəzi Bankın (AMB) saytında yerləşdirilən ödəmə balansında deyilir ki, 2015-ci ilin üç rübü ərzində Azərbaycan iqtisadiyyatına 5,7 mlrd dollar həcmində birbaşa xarici investisiya cəlb edilib, bütün investisiyaların 88,2%-i neft sektorunun payına düşüb.

2014-cü ilin yanvar-sentyabr ayralrı ilə müqayisədə Azərbaycan iqtisadiyyatına birbaşa investisiyalar 1,72% azalıb. Müqayisə üçün: 2014-cü ilin yanvar-sentyabr aylarında bu göstərici 5,8 mlrd dollar olub.

Bu investisiyalar Azərbaycan ərazisində əsasən BP-nin layihələri çərçivəsində aparılan iri neft-qaz işlərinin maliyyələşdirilməsinə yönəldilib: “Şahdəniz-2”-in işlənilməsi və “Azəri-Çıraq-Günəşli” yataqlarının dəniz blokunda aparılan işlər.

Mərkəzi Bankın qiymətləndirməsinə görə, qeyd olunan müddətdə qeyri-neft sektoruna cəlb edilən birbaşa investisiyalar 678 mln dollar yaxud ölkə iqtisadiyyatına cəlb edilən investisiyaların ümumi həcminin 11,8% olub. Bu da ötən ilin analoji dövrü ilə müqayisədə 20,7% azdır. 2014-cü ilin yanvar-sentyabr aylarında Azərbaycanın qeyri-neft sektoruna xarici investisiyaların həcmi 855 mln dollar olub. –12D—