Birjadankənar bazardakı əməliyyatın müəmması açıldı

Turan İA əvvəllər Bakı Fond Birjasına istinadən bildirmişdi ki, avqustda birjadankənar platformada səhmlərin alqı-satqısı üzrə ümumi məbləği 127 mln manat olan Azərbaycan fond bazarı tarixində ən böyük əqd (bəlkə də, əqdlər) həyata keçirilib.

Depozitar naməlum səbəbdən öz hesabatında birjadankənar əqdlər bölməsində bu əməliyyatı qeydə almayıb.

Bu əməliyyatın olması Qiymətli Kağızlar üzrə Dövlət Komitəsinin hesabatından da görünür. QKDK-ya görə, avqustda təkrar bazarda 132 mln 65 min manatlıq əməliyyat olub. Bu dövriyyənin bir hissəsi birja əqdlərinin payına düşür: bu ilin 8 ayında birjada 3 mln 91,9 min manat məbləğində səhmlərin təkrar dövriyyəsi üzrə əməliyyatlar olub.    

Fond bazarının miqyası barədə informasiya reyestrsaxlayıcıların (QK bazarının peşəkar iştirakçısı) qeydiyyata alınan məlumatları əsasında formalaşır. Milli Depozit Mərkəzi avqust hesabatında qeyd edir ki, 4 mln 671,6 min manat məbləğində 24 birjadankənar əqd keçirilib.

Beləliklə, 62 mln ədəd səhm üzrə əməliyyatın hardan və necə keçməsi müəmma olaraq qalırdı. Nəhayət, Turan İA-ya məlum olub ki, söhbət səhmləri 100% dövlətə maxsus olan “Azərbaycan Dəmir Yolları” QSC-nin səhmlərinin qapalı yerləşdirilməsindən gedir. Yerləşdirməni (63 573 183 ədə səhm) anderrayter qismində “Texnika Kapital Menecment” MMC həyata keçirib.

Eyni zamanda, birjadankənar bazarda artım dayanmaq bilmir. BFB-nin məlumatına görə, 15 avqustdan 15 sentyabra kimi birjadankənar platformada QK dövriyyəsi 151,9 mln manat olub. 67 mln 385,7 min səhm əqd predmeti olub. 08B