Birjadankənar korporativ QK üzrə ən iri əqd bağlanılıb

Azərbaycanda korporativ qiymətli kağızların alqı-satqısı üzrə ən iri əqd bağlanılıb. Detallar açıqlanmır.

Bakı Fond Birjası (BFB) 21 avqust üçün səhmlərin birjadankənar bazarının ümumi göstəricilərini açıqlayıb. Məlumata əsasən, depozitar ümumi məbləği 127 mln manat olan 63,5 mln ədəd səhmin alqı-satqısı üzrə əqd qeydiyyata alınıb. Emitentin adı məxfi saxlanılır. 

Əməliyyatın həcminə görə ehtiaml etmək olar ki, söhbət insayder əqdindən gedir. Amma BFB 2013-cü ilin dekabrından insayder əqdləri barədə məlumatı açıqlamır.

2011-ci ilin avqustunda şəffaflığı təmin etmək üçün Qiymətli Kağızlar üzrə Dövlət Komitəsi «Adlı investisiya qiymətli kağızların alqı-satqısı üzrə əqdlərin bağlanması qaydaları»nı təsdiq edib. Sənədə əsasən, depozitar birjadankənar əqdlər barədə BFB-yə ətraflı informasiya verməlidir. Birja isə onu korporativ saytında yerləşdirməlidir. İctimaiyyət bu sənədin qəbul edilməsindən 2011-ci ilin dekabrında xəbər tutub. Birja qaydalara 2,5 ay – 2012-ci ilin yanvarından martına kimi əməl edib. Sonra birja birjadankənar əqdlər haqda informasiyaların açıqlanması üzrə öz qaydalarını qəbul edib. Qaydalara əsasən, qiymətli kağızları alqı-satqı predmeti olan emitentlər haqda informasiyalar maliyyə, sənaye və başqa sektorlar üzrə ümumiləşdirilir.

QKDK, beynəlxalq maliyyə strukturları (DB, Avropa İttifaqı, SECO) BFB-nin bu qanunsuz hərəkətinə reaksiya vermir və şərh etmir. 08B